Arbaco, Ogosto, 10, 2022 (HOL) - Kenya: Goobaha codbixinta ayaa intooda badan haatan si rasmi ah loo xiray, balse cod bixinta ayaa lagu kordhiyay goobo yar yar oo sii furmaandoona illaa dadku ka codeeyaan.
Codeyntan ayaa daba socota olole xooggan oo ay hareeyeen doodo ku saabsan shaqo la'aanta iyo musuqmaasuqa ka jira Kenya.
Musharaxiinta ugu cad cad ee u taagan xilka Madaxweynaha ayaa kala ah Ra’iisul Wasaarihii hore ee Kenya, Raila Odinga iyo madaxweyne ku xigeenka haatan jooga xafiiska, William Ruto.
Kenyaanka ayaa sidoo kale dooranayay baarlamaanka cusub iyo maamullada deegaanka.
Guddiga doorashada ayaan weli ku dhawaaqin tirada guud ee dadka u soo baxay doorashada. Balse in ka badan 56% oo u dhiganta 22 milyan oo codbixiyeyaal ah, ayaa codkooda dhiibtay.
Mid ka mid ah saraakiisha ugu sareysa doorashada gobolka Nyeri ee dalka Kenya ayaa warbaahinta u sheegay in tirada dadka u soo baxay doorashada ay aad u yar tahay marka loo eego sanadkii 2017-kii.
Tirinta codadka oo ka dhacaysa goobaha cod bixinta ayaa la filayaa in dhawaan la bilaabo ka dib markii ay soo xirmeen tirinta codadka doorashada madaxweynaha.
Willian Ruto oo ka codeeyay magaalada Eldoret ee gobolka Rift Valley ayaa wuxuu ballan qaaday inuu aqbali doono natiijada doorashada.
"Waxaan u maleynayaa in markii ugu horeysay taariikhda dimoqraadiyada xisbiyada badan ee Kenya, dhammaan musharixiinta ay ballan qaadeen inay aqbali doonaan natiijada ka soo baxda doorashada," ayuu u sheegay warbaahinta.
Mr Odinga ma uusan la hadlin saxaafadda, laakiin xaaskiisa, Ida Odinga, ayaa sheegtay in uu aad ugu faraxsan tahay doorashada.
Muran ka dhashay natiijadii doorashadii 2007dii ayaa horseeday rabshado toddobaadyo socday oo sababay dhimashada dad lagu qiyaasay 1,200 oo qof, waxayna ku khasbeen ilaa 600,000 oo qof inay ka qaxaan guryahooda.