Sabti, October, 29, 2022 (HOL) - Shirka wasaaradaha diinta iyo awqaafta ee dowladda federalka Soomaaliya iyo dowlad goboleedyada, kaasoo Muqdisho ka socday muddo shan cishe ah ayaa lagasoo saaray fadwo lagu taageerayo kacdoonka looga soo horjeedo kooxaha Alshabaab iyo Daacish.
Qodobka ugu horreeya ee fadwadan ayaa ku baaqay in lala dagaalamo Alshabaab iyo Daacish, islamarkaana waxaa maanta kadib magacooda loogu yeeridoonaa “Khawaarij”
Madaxweynaha Soomaaliya, raysal wasaaraha iyo qaar kamid ah madaxweynayaasha dowlad goboleedyada ayaa ka qeyb galay xiritaanka shirkaan, kaasoo laga jeediyay khudbado lagu taageerayay bayaanka wasaaraddaha awqaafta, laguna naqdinayay afkaaraha diinta Islaamka ka hor imaanaya ee ay Alshabaab iyo Daacish daliishadaan.
Wasiirka diinta iyo awqaafta dowladda Soomaaliya, Sheikh Mukhtaar Roobow Abuu Mansuur oo xiganayay Fatwada ayaa sheegay in Shabaab iyo Daacish dagaalkooda bannaan yahay, ayna sahlan tahay in laga adkaado oo la suuliyo fikirkooda.
Halkaan ka akhriso qodobada Fatwada.1: In lala dagaalo Alshabaab iyo Daacish
2: Inay xaaraan tahay dhaqaale kasta oo la siiyo Khawaarijta, islamarkaana ay isku mid yihiin, qarax side iyo qarash bixiye.
3: In maanta wixii ka dambeeya kooxaha Shabaab iyo Daacish loogu yeero Khawaarijta
4: In laga horyimaado wax kaste oo ka hor imaanaya shareecada islaamka iyo dhaqanka suuban, sida isticmaalka daroogada iyo anshax xumada baraha bulshada ee internetka.
5: In la taageero, loona sameeyo qorshe iyo siyaasad qaran oo lagu horumarinayo xarumaha diinta islaamka lagu barto.
6: In la dhiso sanduuqa Sakada iyo hay’adda awqaafta qaranka Soomaaliyeed.
7: In la qabto shirweyne ay kasoo qeyb galaan culimada ku sugan dalka iyo dibadda, si looga tashado, gaar ahaan ka ilaalinta diinta islaamka afkaaraha qalloocan.
8: In muddo kooban lagu dhameystiro habraacyada iyo xeerarka laga maarmaanka u ah dhismaha golaha sare ee culimada Soomaaliyeed oo ay u dhan yihiin dowladda federalka iyo dowlad goboleedyada, kaasoo noqonaya marjaca diiniga ah.
9: In arrimaha xajka ay si wadajir ah uga wada shaqeeyaan wasaaradda diinta iyo awqaafta dowladda Soomaaliyeed iyo wasaaradaha diinta iyo awqaafta ee dowlad goboleedyada.
10: Shirweynuhu wuxuu bogaadinaya kacdoonka dadweynaha Soomaaliyeed ee ka dhanka ah kooxaha Khawaarijta.
11: Ugu dambayn, shirweynuhu wuxuu ugu baaqayaa dammaan shacabka Soomaaliyeed inay u midoobaan la dagaalanka kooxaha kharaarijta diinta, bannaystana dhiiggooda iyo maalmooda.