Madaxweynaha Jubbaland oo booqday ciidan loo diyaariyay la-dagaallanka al Shabab
Isniin, November, 28, 2022 (HOL) - Madaxweynaha Jubbaland Axmed Maxamed Islaam, wasiirka
gaashaandhigga Cabdulkhadir Maxamed Nuur iyo taliyaha ciidanka xoogga dalka
General Odowaa Yusuf Raage, ayaa maanta booqday ciidamada qalabka sida ee loo
diyaariyay howlgalka dhawaan ka bilaabanaya deegaannada Jubbaland.
Madaxweynaha ayaa sheegay in al Shabab looga adkaaday
dagaallada ka socda gobollada dalka, gaar ahaan Hiiraan, Galgadud iyo
Shabellaha dhexe, isla markaana deegaannada maamulka Jubbaland ay ka bilaaban
doonaan howgallo cusub. Wuxuu intaasi raaciyay in ciidanka loo diyaariyay la-dagaallanka
al Shabab ay ka koobanyihiin qeybaha kala duwan ee ciidamada maamulka.
Axmed Maxamed Islaam, ayaa hoosta ka xariiqay in marka
deegaannada laga saaro al Shabab ay diyaar yihiin hay’adihii la wareegi lahaa
sida nabad sugida iyo booliska si loo soo celiyo nidaamka iyo kala dambeynta.
Taliyaha ciidanka xoogga dalka General Odowaa Yusuf Raage,
ayaa soo dhoweeyay diyaarinta ciidanka cusub ee bilaabi doona dar-dargelinta
howgallada ka dhanka ah al Shabab ee Jubbaland.
Madaxda ma aysan shaacinin tirada ciidanka iyo halka uu ka
bilaaban doono howgallada, maadaama al Shabab ay gacanta ku hayaan deegaanno
badan oo ka tirsan saddexda gobolka ee maamulka Jubbaland.
