Xarunta dhaqanka ee Aw-Jaamac oo Muqdisho kusoo gabo-gabeysay tababar socday shan bilood
Arbaco, May, 25, 2022 (HOL) - Xarunta dhaqanka, cilmi baarista iyo akhriska ee Aw-Jaamac
Cumar Ciise, ayaa maanta magaalada Muqdisho kusoo gabo-gabeysay tababar socday
muddo shan bilood oo in ka badan 80 dhallinyaro ah lagu barayay noocyada kala
duwan ee farshaxanka.
Dhallinyarada ka faa’iideysatay tababarka oo u badnaa gabdho waxaa kamid ahaa 25 arday oo ah kuwa maqalka naafada ka ah, waxaana
dhammaan ardayda la baray xirfado ay kamid yihiin sida loo sameeyo
agab-dhaqameedka, gaar ahaan falkinta dambiilaha, dhiisha, saliga, derimaha,
xaaqinka iyo tolliinka dharka, timo dabida iyo sida cilaanka loo saaro.
Fardowsa Jaamac Yuusuf oo ka tirsan xarunta oo ka hadashay munaasabada, ayaa hoosta ka xariiqday in xarunta dhaqanka ee Aw-Jaamac
ay ka go’anta soo nooleynta, dhiiragelinta dhaqanka, hal-abuurka Soomaaliyeed
iyo wax kasta oo Soomaaliddu ay ku sameysan jireen gacanta.
“Marka dhallinyarada aan barno xirfadaha, gaar ahaan
gabdhaha waxaan ku xirnaa xarumaha sida goobaha cilaanka lagu saaro, isla
markaana lagu dabo timaha- marka goobtaasi ay yimaadaan dumar iyo gabdho badan
oo raba in loo shaqeeyo, waxaa loo yeeraa ardaydii wax ka bartay xarunta
Aw-Jaamac, kaddib marka shaqada ay qabtaan, lacagaha laga qaaday qofka loo
shaqeeyay ayaa qeyb laga siiyaa. Halka gabdho kale ay iskood u shaqeystaan” ayey tiri Fardowsa.
Fardowsa ayaa intaasi raacisay in dhallinyarada dhiiragelin
ay helayaan marka la baro farshaxanka iyo agab-dhaqameedka, taasi oo u sahleysa
in ay ka shaqeystaan kaddibna ay ka dhaxli doonaan jiilka cusub ee soo koraya. Waxaa
ay intaasi ku dartay, “Dalkeenna waxa uu xiligan ku jiraa waqtigii ugu xumaa oo
carruurteena iyo dhallinyaradeenna ayaa si dhib yar ula qabsada telefoonada
caaqalka, taas oo ka mashquulineysa in ay ku dheganaadaa dhaqankooda iyo in ay wax-qabsadaan".
Xarunta dhaqanka, cilmi baarista iyo akhriska ee Aw-Jaamac
Cumar Ciise ayaa 30-ka iyo 31-ka bishan magaalada Muqdisho ku qaban doonta
maalinta dhaqanka, halkaasi oo ardayda maanta tababarka dhammeysatay ay kusoo
bandhigi doonaan xirfadihii ay barteen shantii bilood ee lasoo dhaafay.
Hassan Istiila, Hiiraan Online
[email protected]
