Arbaco, Maarso, 30, 2022 (HOL) - Maxkamada Gobolka Maroodijeex, ayaa xukun hal sanno oo xadhig ah iyo hal milyan oo shilling ka Somaliland ah oo ganaax ah ku riday wariye Axmed Qani Xirsi, oo ka howlagala muuqbaahiyaha Star, kadib qoraal uu ku baahiyay bartiisa Facebook.
Axmed Qani ayaa loo haystaa qoraal uu ku baahiyay bartiisa Facebook, oo maxkamadu ku tilmaantay been abuur, waxaanu xabsiga ku jiray muddo bil ah, iyadoo lasoo xidhay 23 bishii February.
Urrurka suxufiyiinta Somaliland ee SOLJA, ayaa cambaareeyay, xadhiga wariyaha, qoraal lagu baahiyay boga Facebook ga ee urrurka, ayaa lagu sheegay in talaabadani warbaahinta ka hor istaagayso in ay tabiyaan wararka.
"Urrurka Suxufiyiinta Somaliland waxa uu aad uga xunyahay xukunka lagu riday wariye Axmed Qani kaas oo keenaya Isla Markaasna ka hor istaagaya in saxafiyiinta ay ku dhiiradaan tabinta wararka iyo xogaha kale ee ay u gudbinayaan bulshada", ayaa lagu yidhi qoraalka SOlJA.
Urrurka suxufiyiinta ayaa hay'adaha sharciga usoo jeediyay in wariyaha xoriyadiisa loo soo celiyo, iyaga oo ku baaqay in xadhiga wariyayaasha loo maro wado sharciga waafaqsan.