Guddoomiye Xaliima Ismaciil: Jadwalka ay soo saareen Guddiga FEIT waxaa igala qaldan in xafladda dhaarinta xildhibaanada ay iyagu qaban-qaabinayaan
Khamiis Maarso, 17, 2022 (HOL) - Guddoomiyaha Guddiga Madaxabannaan ee Doorashooyinka Qaranka
Soomaaliya Xaliimo Ismaaciil ayaa qoraal ay soo dhigtay barteeda Facebook
uga hadashay jadwalka ay soo saareen guddiga hirgalinta doorashooyinka dadban
ee heer federaal (FEIT).
Gudoomiye Xaliima Yarey ayaa qoraalkeeda ku sheegtay in guddiyadda
doorashooyinka dadban ay wajibaadkoodu kala cadyihiin isla markaasna guddiga FEIT
ee heer federaal wajibaadkooda uu ka midyahay inay shaaciyaan natiiyada ugu
dambeysa ee kuraasta xildhibaanada iyaga oo aan waxba ka badalin natiijooyinka
ay soo gudbiyeen guddiga doorashada dadban ee heer gobol ee SEIT.
Guddiga doorashada dadban ee heer federaal ayay sidoo kale Xaliima
Ismaciil sheegtay in doorkooda ay ka mid tahay bixinta shahadooyinka xildhibaanada kadibna ay u gudbiyaan Xoghayayaasha Guud ee Barlamaanka
Soomaaliya faylka xildhibaanka oo dhamaystiran.
“Jadwalka ay soo saareen FEIT waxaa ka qaldan qodobka ugu
dambeeya oo sheegaya in xafladda dhaarinta xildhibaanada ay qaban
qaabinayaan FEIT oo kaashanaya xafiiska ra’isulwasaaraha” ayay ku tiri Xaliima
Ismaciil qoraalka ay soo saartay.
Jadwalka ay soo saareen guddiga FEIT ee heer federaal waxaa
ku jira qodob sheegaya inay mid-mid u hubin donaan dukumentiyada xildhibaanada
labada aqal ka hor inta aan loo gudbin Xoghayayaasha Guud ee baarlamaanka
Soomaaliya.
Dowlad goboleedyada Galmudug iyo Koonfur Galbeed ayaa
qoraallo ay soo saareen uga horyimid jadwalka ay soo saareen guddiga FEIT.
Koonfur Galbeed ayaa sheegtay in xafiiska ra’iisulwasaaraha
iyo guddiga doorashooyinka heer federaal aysan wax shaqo sharciga waafaqsan ku
laheyn u yeerista xildhibabaanada la doortay, taas badalkeed dowlad goboleedka Koonfur Galbeed ay
kelliya aqbaleyso jadwal ay ku heshiiyaan Golaha Wadatashiga Qaranka.
Dhinaca kale dowlad gobaleedka Galmudug ayaa dhankooda ka
horyimid qoraalka ka soo baxay guddiga doorashooyinka FEIT.
Safaraadda Mareykanka ee Soomaaliya ayaa iyaguna qoraal ay soo dhigeen
bartooda Twitter-ka waxay ku soo dhaweeyeen jadwalka ay soo saareen guddiga
FEIT. Waxay qoraalkooda ku sheegayeen inay rajeynayaan la kulanka xildhibaanada
cusub marka la dhaariyo 14 April 2022.
Qoraalka ka soo baxay guddoomiyaha Guddiga Madaxabannaan ee
Doorashooyinka Qaranka Xaliima Ismaciil ayaa ku soo beegmaya xilli uu jiro qilaaf
ku saabsan cidda qabaneysa munaasabda dhaarinta xildhibaanda iyo cidda awood u
leh inay soo saaraan jadwalka dhameystirka doorashada 2020-2022.
Hiiraan
Online News desk
