Arbaco, Maarso, 16, 2022 (HOL) - Dowladaha Soomaaliya iyo Itoobiya ayaa bilaabay dadaalo ay ku hormarinayaan xiriirka ganacsi ee labada dowladood, Wasiiru dowlaha ganacsiga iyo isdhexgalka Bariga Afrika ee Itoobiya Denge Boru iyo Wasiirka Ganacsiga & Warshadaha dowladda Federaalka Soomaaliya Khaliif Cabdi Cumar ayaa maanta si rasmi ah u daah furay wadaxaajoodyo ganacsi oo u dhaxeeya Soomaaliya iyo Itoobiya.
Wasiirrada waxay isla garteen muhiimadda ay wada hadalladaan u leeyihiin shaqo abuurka iyo maalgashiga dhinacyada ganacsiga iyo warshadaha labada dal, waxayna go'aansadeen in la bilaabo wadatashiyo ku aadan xoojinta xiriirka Ganacsi ee labada wadan.
Qoraal kasoo bacay Wasaaradda Ganacsiga iyo Warshadaha Dowladda Soomaaliya ayaa lagu sheegay in dowladdaha Itoobiya iyo Soomaaliya ay bilaabayaan wadaxaajood ku saabsan yagleelidda heshiiska ganacsiyada isaga kala goosha xuduudaha iyada oo ujeedadu tahay in la fududeeyo badeecooyinka muwaadiniinta labada dal iyo in la yareeyo ganacsiga aan rasmiga ahayn ee xuduudaha.
Labada wasaaradood waxay sidoo kale ay ka wada hadleen oo ay heshiis ku gaareen in ay wadahadlaan kadibna ay kala saxeexdaan heshiis ganacsi oo laba geesood ah kaas oo kaabaya dadaallada isdhexgalka gobolka iyo Afrika oo ay ka mid yihiin Suuqa Iskaashiga Ganacsiga ee Bariga & Koofurta Afrika ee COMESA iyo Aagga Ganacsiga Xorta ah ee Afrika (AfCFTA).
Labada Wasiir waxa ay kaloo ku heshiiyeen in la dhiso guddi ganacsi oo isku dhaf ah oo fududeeya shuruudo lagu sii xoojinayo xiriirka ganacsi ee labada dal iyo kordhinta mugga ganacsiga. Iyagoona isla qaatay in hawlaha mudnaanta leh ee kor u qaadaya isku xirka ganacsiga iyo dhiirrigelinta isdhaafsiga ganacsi ee labada dal, sidaa awgeed wasiirradu waxay isku raaceen in la fududeeyo abaabulka golayaasha ganacsiga, is dhaafsiga khubarada iyo barnaamijyada khibrad wadaagga.
Ugu danbeyn Khaliif Cabdi ayaa ku casuumay dhiggiisa Itoobiya Mudane Denge Boru iyo Wafdigiisa in ay booqasho ku yimaadaan magaalada Muqdisho, si loo xoojiyo xiriirka labada dowladood.