Isniin, Janaayo, 31, 2022 (HOL) - Iyadoo Maanta magaalada Jowhar ee xarunta gobolka Sh/dhexe ay ka bilaabatay doorashada lix kursi oo ka mid ah kuraasta Golaha Shacabka Baarlamaanka 11-aad ee dalka Soomaaliya, ayaa waxaa hoolka doorashada ka dhacday arrin ugub ku ah doorashada Golaha Shacabka oo ay horay u qabteen maamulada kale ee dalka.
Arrinta layaabka badan ee maanta sida weyn loo hadal haayo ee ka dhex dhacday hoolka doorashada ay ka socoto ee magaalada Jowhar ayaa aheyd inuu soo xaadiri waayay goobta mid ka mid ah Musharaxiintii loo diiwan geliyay inuu ku tartamo kursiga tirsigiisu yahay HOP 005 oo lagu magacaabo Maxamed Cali Cumar, waxaana markuu soo xaadiri waayay codadka Sanduuqa lagu riday ee ergada u aruuriyay guddiga doorashada Hirshabeelle, maadama uusan goobta u joogin cid Wakiil u aheyd waxaana codadkii la tiriyay ku guuleystay Musharxii goobjooga ahaa Maxamed Cumar Ceymoy oo helay codad gaarayay 73, iyadoo musharaxii maqnaha ahaayna uu helay 13 sida uu ku dhawaaqay guddoomiyaha guddiga doorashada Hirshabeelle.
Hadal heyn aad u badan ayaa ka dhalatay in Musharax aanan goobta joogin tartan la galiyo, iyadoo ilo xog ogaal ah ay sheegeen in Musharaxa soo xaadiri waayay goobta tartanka uu markii horeba ahaa Musharax malxiis ka ahaa doorashada oo balamahii lala galay aanan loo fulin sidaasna ay tahay sababta uu u imaan waayay hoolka doorashada ka dhaceysay.
Maalmahi lasoo dhaafay waxaa si weyn u kordhaayay buuqa iyo walaaca beelaha qaar iyo Musharaxiinta kasoo yeeray ee ku aadan in la boobayo kuraasta Golaha Shacabka oo shaqsiyaad gaar ah loo xirayo, taasoo haatan u muuqaneysa mid banaanka usoo baxi haysa maadama Musharaxiina tartamaya intooda badan lasii ogyahay kuwa kusoo baxayo kuraasta lagu tartamayo.