Arbaco, December, 7, 2022 (HOL) - Xisbiyada mucaaradka Somaliland oo la kulmay dibu-lumaasiyiin ka socda Norwey iyo Turkiga, oo doonayay in dib loo furo wada-hadaladii Somaliland iyo Soomaaliya, ayaa u sheegay in anay wakhtigan haboonayn in wada-hadalada dib loo furo.
Mucaaradka oo la kulmay dibulumaasiyiinta kala ah Heidi Johansen iyo Aykut Kumbaroglu, ayaa u sheegay in aan wax wada-hadal ah aan Soomaaliya lala furi karin ilaa laga xaliyo khilaafka siyaasadeed ee u dhexeeya xukuumada iyo mucaaradka Somaliland.
"Ergada iyo madaxda mucaaradka ayaa kawada hadlay, sidii dib loogu bilaabi-lahaa wada hadaladii Somaliland iyo Somalia, waxaanay madaxda mucaaradku ay ergada u sheegeen in aanay immika haboonayn in dib loo bilaabo, ilaa laga gudbayo khilaaf-yada gudaha ee ku saabsan doorashooyinka" ayaa lagu yidhi war-saxaafadeed kasoo baxday kulanka.
Madaxweynaha Somaliland oo xalay ergada ku qaabilay qasriga madaxtooyada, ayaa isna dhankiisa u sheegay in aan wada-hadalada la furi karin ilaa la fuliyo 7 shuruudood oo ay ugu horayso in Soomaaliya ay hirgaliso dhamaan heshiisyadii hore loo galay.
Dhinaca kale, Madaxweynaha Soomaaliya Xasan Sheekh Maxamuud, oo ergada hore ula kulmay, ayaa sheegay in uu diyaar u yahay in wada-hadalada dib loo furo.
Abdilahi Geel-maal, Hiiraan Online
[email protected]