Hiiraan Online

 

Arbaco, September, 22, 2021 (HOL) - Wararka ka imaanaya deegaanka Hoosingoow ee gobolka Jubbada Hoose ayaa sheegaya inuu halkaasi ka dhacay maanta dagaal culus oo u dhaxeeya ciidamada Kenya iyo kuwa dagaalamayaasha Al-shabaab.

Dagaalka ayaa yimid kadib markii ciidamo ka tirsan dagaalyahanada Shabaab ay weerar ku qaadeen Saldhiga ay ku leeyiiin deegaanka Hoosingoow ciidamada Kenya ee ka tirsan howlgalka ciidamada AMISOM.

Dadka deegaanka Hoosingoow ayaa warbaahinta u sheegay in dagaalka labada dhinac dhexmaray uu ahaa mid aad u xoogan oo la isku adeegsaday hubka noocyadiisa kala duwan, islamarkaana uu ka dhashay dagaalka khasaare kala gaaray labada dhinac iyo waliba dad rayid ah oo rasaasta ugu tagtay aqaladooda, inkastoo aysan xaqiijin khasaaraha inta uu gaarsiisan yahay.

Majirto wax war ah oo kasoo baxay dhanka dhinacyada Al-shabaab iyo Saraakiisha ciidamada Kenya oo ku aadan dagaalka maanta ku dhexmaray deegaanka Hoosingoow ee gobolka Jubbada Hoose.

Al-shabaab ayaa inta badan weeraro gaadmo ah iyo kuwa toos ahba ku qaada Saldhigyada ciidamada Kenya iyo kuwa maamulka Jubbaland ku leeyihiin deegaanada maamulka Jubbaland gaar ahaan gobolka Jubbada Hoose.

Jamaal Cali Cabdi, Hiiraan Online
[email protected]