Hiiraan Online

 

Jimco, November, 26, 2021 (HOL) - Guddiga hirgelinta doorashooyinka maamulka Koonfur Galbeed ayaa ku dhawaaqay qabashada sadax kursi oo ka mid ah kuraasta Golaha Shacabka Baarlamaanka Fedaraalka Soomaaliya ee deegaan doorashadoodu tahay Koonfur Galbeed Soomaaliya.

War qoraal ah oo ay soo saareen guddiga ayaa lagu sheegay in doorashada sadax kursi oo ka mid ah Golaha Shacabka lagu qabanayo magaalada Baydhabo ee xarunta gobolka Baay, 27-ka bishaan oo ku beegan maalinta berito ah ayay guddigu sheegeen iney dhaceyso doorashada sadaxda kursi uu tirsigoodu kala yahay HOP 182, HOP 170 iyo HOP171.

Kursiga HOP#182 waxaa afartii sano ee lasoo dhaafay ku fadhiyey guddoomiyaha Golaha Shacabka Maxamed Mursal Sheekh Cabdiraxmaan, halka kursiga tirsigiisu yahay HOP#170 uu afartii sano ee la soo dhaafay ku fadhiyay Iimaan Cabdullaahi Cali, halka kursiga sadaxaad ee tirsigiisu yahay HOP#171 ay ku fadhisay afartii sano ee la soo dhaafay Fowsiya Maxamed Sheekh.

Maamulada Galmudug iyo Soomaaliland ayaa horay u doortay qaar ka mid ah kuraasta Golaha Shacabka, waxaana Maamulka Koofur Galbeed uu noqonaya maamulkii sadaxaad ee guda gala qabashada doorashada kuraasta Golaha Shacabka Baarlamaanka 11-aad ee Soomaaliya.

Jamaal Cali Cabdi, Hiiraan Online
[email protected]