10/21/2021
Today from Hiiraan Online:  _
Wararka Maanta- Talaado, Sept 7 , 2021
Ciidamo ka Tirsan Militariga Soomaaliya oo ku baxay dagaalada ka socda Kabxanleey iyo shacab ku banaanbaxay
 

Talaado, September, 7, 2021 (HOL) - Wararka haatan naga soo gaaraya magaalada Baledweyne ee xarunta gobolka Hiiraan ayaa sheegaya in ciidamo ka tirsan dowlada Soomaaliya ay u dhaqaaqeen deegaanka Kabxanleey oo ay ku dagaalamayaan laba Maleehiyo beeleed.

Ciidamada ku baxay dagaal beeleedka kasocda deegaanka Kabxanleey ayaa mudo dhowr saacadood ah waxaa magaalada bartamaheeda banaanbaxyo xoogan kala hortagay boqolaal shacab ah oo diidana ciidamadan iney aadaan dhanka deegaanka Kabxanleey.

Qaar ka mid ah banaanbaxayaasha oo la hadlay warbaahinta ayaa sheegay in ciidamadan aysan u jeedkoodu aheyn iney istaajiyaan dagaalka, maadama ku dhawaad 10 maalmood Maleeshiyaadka dagaalamaya ay isku hor fadhiyen deegaanka Kabxanleey ciidamadana xiligaasi aysan sameynin wax talaabo ah oo ay uga hortagayaan inuu dhaco dagaalka haatan socda.

Deegaanka Kabxanleey oo 35 KM dhinaca Waqooyi Baledweyne kaga beegan waxaa labadii maalin ee lasoo dhaafay ka jiray dagaalo toos ah oo u dhaxeeyay Maleeshiyaadka laba beelood waxaaana inta la xaqiijiyay dagaaladaasi ku dhintay in ka badan 10 ruux oo labada dhinac ah.

Khasaaraha dhimashada marka laga soo tago waxaa jira in xalay deegaanka Kabxanleey lagu gubay guryo iyo beero aad u fara badan, inkastoo ay maanta xaaladu aheyd mid dagan oo aanan wax dagaal ah ka dhicin deegaanka kabxanleey.

Jamaal Cali Cabdi, Hiiraan Online
[email protected]












Click here
9/7/2021 6:10 PM EST
Talaado, September, 7, 2021 (HOL) - Madaxweynaha Soomaaliya Maxamed Cabdullaahi Farmaajo ayaa aqbalay istiqaalo uu usoo gudbiyay Agaasimaha Nabad Sugidda iyo Sirdoonka Qaranka, Fahad Yaasiin, isagoo dhinaca kale u magacaabay la taliyaha amniga madaxweynaha.

9/7/2021 2:13 PM EST
Talaado, September, 7, 2021 (HOL) - Raysal wasaaraha Soomaaliya Maxamed Xuseen Rooble ayaa sheegay in loo diyaar garoobayo qabashada doorashada gobolada Waqooyi ee Somaliland, kadib heshiiskii dhawaan laga gaaray khilaafkii ka dhex taagnaa siyaasiyiinta kasoo jeeda deegaanadaasi.

9/7/2021 1:26 PM EST
Talaado, September, 7, 2021 (HOL) - Beesha Caalamka ayaa war saxafadeed kasoo saartay Khilaafka siyaasadeed ee ka dhashay kiiska Ikraan Tahliil Faarax oo ay hay'adda NISA sheegtay iney dileen Al-shabaab, iyadoona Shabaab ay iska fogeysay dilka Ikraan Tahliil.

9/7/2021 11:42 AM EST
Talaado, September, 7, 2021 (HOL) - Guddoomiyaha xisbiga mucaaradka Somaliland ee UCID Faysal Cali Waraabe, ayaa sheegay in Soomaalidu ay dacaayadayso Somaliland isla markaana ay buun buuniyaan qadiyadaha ka dhan ka ah, isagoo sheegay in ay adeegsadaan dad reer Somaliland ah.

9/7/2021 7:59 AM EST
Talaado, September, 7, 2021 (HOL) - Wararka ka imaanaya gobolka Hiiraan ayaa sheegaya in barqanimadii maanta uu shil gaari oo khasaaare dhimasho iyo dhaawacba leh geystay uu ka dhacay inta u dhaxeysa wadada dheer ee xiriirisa Baledweyne iyo Maxaas.

9/7/2021 7:49 AM EST
Talaado, September, 7, 2021 (HOL) - Qoraal kasoo baxday Wasaarada Arrimaha Dibadda ee Kenya, ayaa lagu sheegay magacyada 4 masuul oo ay dowlada Kenya u magacowday xafiiska dibulumaasiyadeed ee ay ka furanayso caasimada Somaliland ee Hargaysa.

9/7/2021 4:38 AM EST
Talaado, September, 7, 2021 (HOL) - Wasiirka Shaqada iyo Arrimaha Bulshada Xukuumadda Federaalka Soomaaliya, Mudane Cabdiwahaab Ugaas Xuseen Ugaas Khaliif oo booqasho ku jooga magaalada Qaahira ayaa kulan gaar ah la qaatay dhiggiisa dalka Masar, Maxamed Saafan, kulankaa oo uu goob-joog ka ahaa safiirka Soomaaliya ee Masar ahna wakiilka joogtada ah ee Jaamacadda Carabta, Ilyaas Sheekh Cumar.

9/7/2021 2:05 AM EST
Talaado, September, 7, 2021 (HOL) - Raysal wasaaraha Xukuumadda Fedaraalka Soomaaliya Maxamed Xuseen Rooble ayaa kulan kula qaatay Xafiiskiisa taliyeyaasha ciidamada Qalabka sida iyo guddoomiye ku xigeenka koowaad ee Baarlamaanka Soomaaliya.

9/7/2021 1:53 AM EST
Talaado, September, 7, 2021 (HOL) - Kooxda Alshabab ayaa xalay tiro madaafiic ah ku weerartay saldhig ciidamada maamulka Puntland ku leeyihiin tuulada Af-urur oo qiyaastii 70km u jirta magaalada Bosaso.

9/7/2021 1:41 AM EST
Talaado, September, 7, 2021 (HOL) - Dowlad goboleedka Puntland ayaa raysal wasaaraha Soomaaliya ku boggaadisay tallaabadii uu shaqada kaga joojiyay agaasimihii hay’adda nabad sugida ee NISA, Fahad Yaasiin.

9/7/2021 1:16 AM EST
Talaado, September, 7, 2021 (HOL) - Raysal wasaaraha Xukuumadda Soomaaliya Maxamed Xuseen Rooble oo ka hadlay dagaalka ka socda deegaanka Kabxanleey ayaa ku baaqay in si deg deg ah u joojiyaan beelaha walaalaha ah ee deegaankaasi ku dagaalamaya.

9/7/2021 1:10 AM EST
Talaado, September, 7, 2021 (HOL) - Guddoomiyaha guud ee beelaha Dir Suldan Cabdiraxmaan Jaamac Dhawal, oo muuqbaahiyaha Saab kula hadlay xafiiska beesha ee magaalada Hargaysa, ayaa baaq nabadeed u diray beelaha ku dagaalamaya deegaanada Kabxanlay iyo Deefow ee gobolka Hiiraan.