Faahfaahin ku saabsan dagaal u dhaxeeya ciiddanka dowladda iyo kuwa Ahlsunna oo ka dhacay deegaanka Bohol
Khamiis, September, 30, 2021 (HOL) - Faahfaahin dheeraad ah ayaa kasoo baxaysa iska hor imaad deegaanka Bohol oo 20km u jirta Dhuuso-mareeb, ku dhexmaray ciidamada dowladda federalka Soomaaliya iyo kuwa Ahlusunna Waljameeca.
Wararka aan helayno waxay sheegayaan in ciidamada Dowladda ay la wareegeen gacan ku heynta Deegaanka Bohol, halkaas oo muddooyinkii dambe ay isku aruursanayeen ciidamada Ahlusunna.
Khasaare dhimasho iyo dhaawac ayaa ka dhashay iska hor imaadka, waxaana xogaha aan helayno ay sheegayaan in dagaalku ka bilowday kadib markii ciidanka Ahlusunna ay weerar kusoo qaadeen fariisin Ciidanka dowladdu ku lahaayeen duleedka Bohol.
Dadka shacabka ah oo warbaahinta u warramay waxay sheegeen in deegaanka lagusoo garaacay hoobiyaal, waxayna maamulka Galmudug iyo dowladda federalka ku eedeeyeen in ay dagaal siyaasadeed kusoo qaadeen Bohol, oo markii hore xarun u ahayd Ahlsunna.
Dhinaca kale, hoggaamiyaha xisbiga Wadajir, Cabdiraxmaan Cabdishakuur ayaa ku baaqay in la joojiyo dagaalka ka socda deegaanka bohol ee Galmudug.
“Cadawga Galmudug waa Al-Shabaab. Dagaal kasta oo lagu qaado cid aan Al-Shabaab aheyn wuxuu ka dhigan yahay gacansiin dadban oo argegexisada la siiyo iyo doorashadii oo looga mashquulo, labada arrinna waxay dan u yihiin Villa Somalia,” ayuu yiri Cabdiraxmaan Cabdishakuur.
Wuxuu ugu baaqay hoggaanka Galmudug, odayaasha dhaqanka iyo waxgaradka deegaanka in dirirta lagu beddelo wadahadal, abaabulka iyo awoodda ciidanna Al-Shabaab lagu wajaho iyadoo mideysan.
Abdiweli M. Sheikh, Hiiraan Online
