Sabti, September, 18, 2021 (HOL) - Labo musharrax oo katirsan musharraxiinta aqalka sare ee dowlad goboleedka Hirshabeelle oo Muqdisho shir jaraa’id ku qabtay, ayaa diiday in ay ka qeyb galaan doorashada ka socota Jowhar, iyagoo sheegay in lagu sameeyay handadaad dil.
Musharraxiintan oo lagu kala magacaabo, Cusmaan Axmed Macow iyo Cabdinuur Ibraahim Nuur, ayaa ku eedeeyay guddoomiye ku xigeenka labaad ee barlamaanka Hirshabeelle oo ka garab ka helaya madaxweynaha Hirshabeelle in uu ololaynayo Xasan Iidow Maxamed (Kobac) oo ah musharrax kula jira kursiga ay ku tartamayaan.
Cabdinuur Ibraahim Nuur oo warbaahinta kula hadlay Muqdisho ayaa sheegay in ay kasoo carareen Jowhar, iyagoo amnigooda u baqaya, wuxuuna sheegay in ay codsanayaan in baaritaan lagu sameeyo handadaada uu sheegay in loo geystay, ayna helaan caddaalad.
Wuxuu codsaday in aan la qaban doorashada kursigooda, illaa iyo inta laga helayo cid damaanad qaada ammaankooda islamarkaana laga xaqiijiinayo in doorashadu u dhacayso qaab caddaalad ah.