Madaxweynaha Puntland '' waa in aan dalkan ka ilaalinaa dib u noqosho
Jimco, Maarso, 19, 2021 (HOL) - Madaxweynaha dowlad Gobolleedka Puntland Saciid Cabdullaahi Deni oo shalay khubad ka jeedinayay madal looga dhawaaqayay Gole loogu magacdaray '' Badbaado Qaran '' ayaa sheegay in siyaasiyiinta iyo shacabka looga baahan yahay in laga wada qeybqaato sidii dalka horray loogu sii wadi lahaa.
Deni ayaa sheegay in dadaal badan ku bixin doonaan badbaadda dalka iyo sidii looga fogaan lahaa wax kasta oo keeni kara ayuu yiri dib u noqosho, waxaana uu shacabka dalbaday in aan la burburin hormarka uu dalku sameeyay tan iyo wixii ka danbeeyay sanadkii 2000.
''"Dadka Soomaaliyeed waxaan rabnaa in ay ogaadaan in dalkoodu uu maanta hiil uga baahan yahay, in la ilaaliyo howshii lasoo qabtay wixii ka dambeeyay sanadkii 2000 ee dowlad dhiska Soomaaliya loo soo amaamudayay oo maanta meel laga sii amba qaadi karo joogta. Madashan waa mid u furan cid kasta oo ay u muuqato waxa annaga noo muuqday ee ah oo rabta inay ku darsato sidii dalka looga badbaadin lahaa in uu dib u noqdo," ayuu yidhi Deni.
Madaxweynaha Puntland ayaa intaa ku darray ''Dowladda maanta joogta waxay ku fashilantay geeddigii la waday ee qori isku dhiibka ahaa, in markii xilligeeda lasoo gaaray ay u dhiibto qofkii ku xigay. Waxay u baddashay in aysan jirin cid ka horreysay iyo cid ka dambeysay midna,”
Hadalka Saciid Cabdullaahi Deni ayaa imanaya xili Golaha ay ku mideysan yihiin siyaasiyiinta mucaaradka, iyo maamuladda Puntland iyo Jubbaland uga digeen madaxweynaha xiliggan haya talada dalka Maxamed Cabdullaahi Farmaajo muddo korarsi.
Madaxweynayaasha Puntland iyo Jubbaland ayaa u yimid magaalada Muqdisho ka qeybgalka shir ay ku baaqeen bulshada caalamka, hasse ahaatee qabsoomidiisa aan wali la hubin
Madasha cusub ayaa u muuqata mid miisaan hor leh ku kordhin doonta xaalada cakiran ee siyaasadda Soomaaliya gaar ahaan marka laga hadlayo arrimaha doorashooyinka.
Cabdiraxmaan Diini, Hiiraan Online
[email protected]
