Arbaco, April, 14, 2021 (HOL) - Beesha caalamka ayaa qoraal ay galabta soo saareen waxay walaac xooggan kaga muujiyeen meelmarinta uu Golaha Shacabka meelmariyay qaraar lagu bedelayo heshiiskii 17kii Sebtember.
Waxay sheegeen qaraarkaas inuu xambaarsan yahay geedi-socod doorasho oo ay ka dhalan doonto muddo kordhin dheeri ah oo ku timaadda muddo xileedkii loo igmaday Madaxweynaha iyo Baarlamaanka.
Beesha caalamka waxay si cad u sheegeen in aysan taageeri doonin geeddi-socod siyaasadeed oo is barbar socda, doorashooyin aan loo dhamayn, ama dadaallo cusub oo keenaya kordhinta muddo xileedkii hore.
Waxay tilmaameen in qaraarka 12kii Abriil uu wiiqayo nabadda, amniga, iyo xasilloonida Soomaaliya iyo meelo ka baxsan. Sidoo kale uu sii daahin doona qabashada doorashooyin lagu kalsoonaan karo kuwaas oo ay sugayeen dadka Soomaaliyeed.
"Waxaan ku qanacsannahay in hirgelinta heshiiskii 17kii Sebtember uu yahay hanaanka ugu wanaagsan ee waxqabad ee la heli karo sidaa darteed, waxaan ku boorinaynaa madaxda Dowladda Federaalka iyo Dowlad Goboleedyada Xubnaha ka ah Dowladda Federaalka inay si dhakhso leh ugu soo laabtaan wadahadallada si loogu heshiiyo habka hawsha horey loogusii wedi lahaa. Waxaan ugu baaqeynaa dhammaan dhinacyada inay aad isu xakameeyaan, ayna sii wadaan wadahadalka, iskana ilaaliyaan ficillada halka dhinac ah ee kicin kara xiisadaha," ayaa lagu yiri qoraalka beesha caalamka.
Beesha caalamka waxay sheegtay in ay diyaar u yihiin bixinta adeegyada dhexdhexaadinta si loo fududeeyo loona soo nooleeyo wadahadal loo dhan yahay oo ku saleysan heshiiskii 17kii Sebtember.