Madaxweyne Waare oo ka hadlay dilkii guddoomiye ku-xigeenkii Amniga Shabeellaha Dhexe
Isniin, October, 14, 2019 (HOL)-Madaxweynaha dowlad gobolleedka Hirshabeelle Maxamed Cabdi Waare ayaa war ka soo saaray dilkii magaalada Jowhar loogu geystay gudddoomiye ku-xigeenkii Amniga gobolka Shabeellaha dhexe iyo Wiil uu dhalay kaddib weerar Bambaano oo lagu qaaday guri uu ka deganaa magaalada.
Qoraalka ka soo baxay madaxtooyada Hirshabeelle ayaa lagu yiri ''Madaxweynaha Dowlad Goboleedka Hirshabelle, Dr Maxamed Cabdi Waare, oo ku hadlaya Afka Golayaasha iyo kan Shacbiga Hirshabelle ayaa ka tacsiyeeyay Geerida Allaha u naxariistee Guddoomiye ku xigeenkii amniga Gobolka Shabeellaha Dhexe Muxumad Sugaal Cismaan iyo wiil uu dhalay oo xalay u geeriyooday Bam gacmeed lagu weeraray hoygooda Jowhar.
Madaxweynaha ayaa tacsi tiiraanyo leh u diray dhamaan shacabka Hirshabeelle, ehelkii, qaraabadii iyo asxaabtii uu ka baxay Guddoomiye ku
xigeenka Amniga Shabeellaha Dhexe Muxumed Sugaal, waxaana eebe uu uga baryay in janatul fardowsa uu ku galado.
Madaxweyne Waare ayaa tilmaamay in marxuumka uu ahaa xubin muhiim ah oo ka baxday Maamulka iyo shacabka Hirshabelle islamarkaana uu hayay shaqo adag oo muhiim u ah nidaamka dowliga ah, iyo xaqiijinta Amniga.
Madaxweyne Waare ayaa faray hey’adaha
Ammaanka in sida ugu dhaqsiyaha badan ay u sameeyaan baaritaan dhab ah oo la xiriira weerarkaasi lagu dilay marxuum Muxumed Sugaal sharcigana la soo taago dadkii ka dambeeyay.
Ugu dambeyn Madaxweynaha Hirshabelle Dr Maxamed Cabdi Waare oo sii hadlay ayaa guud ahaan Shacbiga Hirshabelle kula dar daarmay in ay muujiyaan feejignaan dheeraad ah meelna uga soo wada jeestaan Al-Shabaab
islamarkaana ay la shaqeeyaan Hay’adaha ammaanka sidoo kalena ay iska hubiyaan cid kasta oo ku soo dhex dhuumaneysa.
C/raxmaan Diini, Hiiraan Online
[email protected]