11/13/2019
Today from Hiiraan Online:  _
Wararka Maanta- Arbaco, Oct 16, 2019
Wasaaradda Beeraha Somaliland oo soo qabanqaabisay munaasibada maalinta Cuntadda Aduunka



Arbaco,Oktoobar,16, 2019 (HOL)–Madaxweynaha Somaliland, Muuse Biixi Cabdi, ayaa ka qayb-galay munaasibad loogu dabbaaldegayo maalinta cuntada adduunka oo ku beegan 16-ka Bisha Tobnaad oo maanta lagu qabtay magaalada Hargeysa.

Munaasibaddan oo ay soo qabanqaabisay wasaaradda horumarinta beeraha Somaliland, ayaa lagu soo bandhigay wax soo saarka kala duwan ee dalka kasoo baxa, waxana ka qayb-galay hay’adaha kala duwan ee dhinaca wax soo saarka ka taageera wasaaradda horumarinta beeraha, xubno ka mid ah beeralayda kala duwan oo ka kala yimi gobollada iyo degmooyinka dalka iyo masuuliyiin xukuumadda ka socota oo uu hoggaaminayo madaxweyne Biixi, waxana halkaas laga jeediyey hadallo lagu liishaamayo muhiimadda ay leedahay inay bulshadu ku dedaasho beerashada iyo tacabka dhulka, si looga maarmo gacan shisheeye.

Xubno ay kamid yihiin wasiirrada wasaaradaha horumarinta Biyaha, Mudane Saleebaan Yuusuf Cali Koore iyo Xannaanada Xoolaha iyo horumarinta Kalluumaysiga, Mudane Xasan Maxamed Cali (Gafaadhi) oo munaasibadda hadallo ka jeediyey, ayaa ku dheeraaday muhiimadda ay leedahay in bulshadu xil iska saarto sidii ay tacab badan u gelin lahayd beerista dhulka ay haystaan, lana soo baxaan cuntada ay cunayaan.

Wasiirka wasaaradda horumarinta beeraha, Mudane Axmed Muumin Seed, ayaa sheegay inay ka wasaarad ahaan hirgeliyeen mashaariic waaweyn oo kor loogu qaadayo heerka wax soo saar ee dalka, laguna yaraynayo ku tiirsanaanta dhinaca cuntada ee dunida kale.

“Waxa noo qabsoomay inaannu ku dhiiranno annaga oo dadkana gacan ka helayna in wax soo saarka dalka kor loo qaado, maantana hubka qudha ee lagu daggaallamayaa waa cuntada, cid cuntada dibadda ku tiirsanina adduunka way yar tahay, Geeska Afrika ayeynu ku naallaa, waddan kasta oo Afrika kamid ahina waxa uu cunaa waxa uu isagu lasoo baxo, taas baannu annaguna doonaynaa annaga oo adiga garab kaa helayna inay Somaliland gaadho isku fillaansho dhinaca cuntada ah,” ayuu yidhi wasiir Axmed Muumin Seed.

Madaxweyne Biixi oo isna madasha ka hadlay ayaa yidhi “Waxa aan bogaadinayaa beeraleyda beeraha ka shaqaysa oo baaqayagii ugu horreeyey ahaa aynnu wax soo saarno waxtarkoodii iyo qodaalkoodii ku dhiirraday dhammaan gobollada oo dhan oo kor u qaaday wax soo saarkii beeraha, in badannina imika ku hawllan tahay inaanu taladaas wada qaadannay oo aannu hawshaas wada galnay oo aynnu u diyaar garowno inaynu cuntadeenna inagu soo saarno oo aynnu yarayno ku-tiirsanaanta dalalka shisheeyaha ah.”

Madaxweynuhu waxa hogo-tusaaleeyey sida loogu baahan yahay in ganacsatada iyo dadka hantida haya looga rabo inay xukuumadda kala qayb-qaataan horumarinta dalka iyo hirgelinta danta guud, maadaama oo ay gacanta ku hayaan 80% (Boqolkiiba siddeetan) hantida Somaliland taalla.

Dhinaca kale, madaxweynuhu wuxuu ka jawaabay cabashadii ka timid xisbiga WADDANI ee ay ku hakiyeen xubintii guddida doorashooyinka uga qaybgalayey, kuwaas oo biyo diiday laba xubnood oo uu madaxweynuhu ku daray guddida cusub ee doorashooyinka.

“Labada xisbi ee mucaaridka ahi waxa ay keeneen labadii xubnood ee sharcigu siiyey, kumaan farogelin, waayo cid baa u dambaysa sharciga oo intayadaba dib u hubinaysa, sidii ay ahayd baanan u qaatay, Guurtiduna way ii keentay, iyana kuma farogelin oo xeerkaa ah in la is ixtiraamo, awoodda joojintana ma lihiye talo ayaan leeyahay, haddaan xataa wax qoonsado waxan odhan karaa xisbiyow malaha arrintaas sharcigaasaa ku gef ah oo Baarlamaanku way kugu qabsan doonaane halkaas ka sax, midnase ma odhan, anna intii sharcigu ii oggolaa uun baan kusoo daray,” ayuu yidhi madaxweyne Muuse Biixi Cabdi.

“Dadkaasna maxkamad baa la geynayaa, maxkamadduna waa Baarlamaanka, Baarlamaanka la leeyahay sharcigii aad dhigteen dadkaas lasoo naqeeyey ma waafaqsan yihiin, shirguddoonka Baarlamaanka oo qudhina ma laha arrintaase waxa leh gole weynaha, way faaqidi oo ka doodi, marka dambena cod bay u qaadi wixii ay soo celiyaanna, haddii aniga la igu soo celiyo iyo haddii xisbi lagu soo celiyoba ceeb ma ahee kuwo kale uun baa keeni oo waa la sixi, waayo sharciga ayaa sidaas oggol, haddii ay sii wada daayaanna waa awooddooda.”ayuu raaciyey hadalkiisa.

Barkhad-ladiif M. Cumar, Hiiraan Online

[email protected]

Hargeysa, Somaliland

 










Click here
10/16/2019 2:41 PM EST
Arbaco, October, 16, 2019 (HOL)-Ciidamada dowladda Soomaaliya ayaa maanta gabi ahaanba albaabada u laabay xarumaha shirkadda CAMEL FOREX oo ah xaruumo ganacsi oo qaab Online ah looga kala Sarifto lacagaha qalaad.

10/16/2019 2:26 PM EST
Arbaco, October, 16, 2019 (HOL)-Kulanka waxaa goob joog ahaa guddoomiyaha golaha shacabka ee BJFS Maxamed Mursal Sheekh Cabdiraxmaan ,guddoomiyaha golaha Aqalka Sare ee baarlamaanka Dalka Mudane Cabdi xaashi cabdullaahi Guddoomiye kuxigeenada koowaad iyo labaad ee Aqalka Sare iyo sidoo kale xubnaha Guddiga dib u eegista iyo la socodka ee baarlamaanka.

10/16/2019 12:48 PM EST
Arbaco, October, 16, 2019 (HOL)-Wasiirka Wasaaradda Maaliyadda xukuumadda Soomaaliya Cabdiraxmaan Ducaale beyle oo ku sugan Magaalada Washington ee dalka Mareykanka ayaa halkaasi kula kulmay Xubno ka tirsan Sanduuqa Lacagta Aduunka.

10/16/2019 11:06 AM EST
Arbaco, Octobar 16, 2019 (HOL)–Wasiirkii Maaliyada Somaliland Dr:Sacad Cali Shire ayaa sheegay in lixdii bilood ee u horeeyey sanadkan lacag ka badan 190 milyan oo dollar lagu soo iibsaday Qaad.

10/16/2019 7:58 AM EST
Arbaco, October, 16, 2019 (HOL)-Wararka ka imanaya deegaanno ka tirsan Maamulka Koonfur Galbeed ayaa sheegaya in isgaarsiintii aysan shaqaynayn iyadoo dhinaca kale ay jiraan dhaqdhaqaaqyo milatari oo ka socda waddada u dhaxaysa magaalada Baydhaba iyo Buurhakaba.

10/16/2019 4:43 AM EST
Arbaco, October, 16, 2019 (HOL)- Warar dheeraad ah ayaa ka soo baxaya qarax subaxnimadii hore ee saakay ka dhacay Waqooyiga magaalada Gaalkacyo.

10/16/2019 4:36 AM EST
Arbaco, October, 16, 2019 (HOL)- Madaxweynaha dowlad gobolleedka Jubbaland Axmed Maxamed Islaam [Axmed Madoobe] ayaa dalacsiiyay Taliyaha Amaanka Garoonka diyaaradaha magaalada Kismaayo oo lagu magacaabo Sadiiq Maxamed Dhogor.

10/16/2019 2:20 AM EST
Arbaco, October, 16, 2019 (HOL)-Taliska cusub ee Booliiska Soomaalyieed ayaa isku shaandheyn ku sameeyay taliye-yaasha Saldhigyada iyo hoggaanka degmooyinka gobolka Banaadir.

10/16/2019 2:08 AM EST
Arbaco, October, 16, 2019 (HOL)-Magaalada Dhuusa-Mareeb ee Xarunta Gobolka Galgaduud waxaa kulan deg deg ah ku yeeshay laamaha kala duwan Dowladda Federaalka iyo Dowlad gobolleedka Galmudug.

10/16/2019 1:53 AM EST
Arbaco, October, 18, 2019 (HOL)-Wararka naga soo gaaraya gobolka Shabeellaha Hoose ayaa sheegaya in kooxo hubeysan halkaa ku gubeen Gaari khudaar u soo siday magaalada Muqdisho.

10/16/2019 1:32 AM EST
Arbaco, October, 16, 2019 (HOL)-Madaxweynaha Mareykanka Donald Trump ayaa Talaadadii shalay ku dhawaaqay inuu dalka Turkiga u dirayo wafdi heer sare ah oo uu hogaaminayo ku xigeenkiisa Mike Pence, si ay Turkiga ugu cadaadiyaan inuu joojiyo dagaalka uu ku qaaday Waqooyiga Suuriya.

10/16/2019 1:27 AM EST
Arbaco, October, 16, 2019 (HOL)- Dowlad Gobolleedka Puntland ayaa markii ugu horeysay sahaciyay tirada iyo dalalka ay ka soo jeedaan Maraakiib si sharci darro ah uga guuleysta xeebaha deegaannada uu maamulku ka armiyo.