Xubnaha guddida cusub ee doorashooyinka Somaliland oo maanta la dhaariyey
Isniin, November 25, 2019 (HOL )– Xubnihii guddida doorashooyinka Somaliland ayaa maanta
lagu dhaariyey xafiiska madaxweynaha hortiisa.
Gudoomiyaha maxkamadda sare ee
Somaliland, Garyaqaan Aadan Xaaji Cali Axmed, ayaa maanta madaxweynaha hortiisa
ku dhaariyey xubnaha cusub ee Komishanka doorashooyinka qaran ee dhawaan la
dhisay.
Xubnahan cusub ee komishanka
doorashooyinka qaranka oo dhawaan uun uu ansixiyey golaha wakiillada
Somaliland, ayaa la mariyey dhaarta Dastuuriga ah, si ay u gudo galaan
gudashada shaqooyinka loo igmaday ee bulshadu ka sugayso.
Madaxweyne Biixi ayaa dhaarta
kaddib xubnaha komishanka cusub dardaaran adag u jeediyey, waxana uu ku
adkeeyey inay dhawraan caddaaladda iyo sinnaanta, islamarkaana garsoorkooda
bud-dhig uga dhigaan Kitaabka Eebbe ee ay ku dhaarteen maanta.
Guddida doorashooyinka ayaa ka
kooban todoba qof, haseyeeshee waxa wali ka maqan xubintii uu magacaabay
xisbiga WADDANI, waxaana hadda lagu dhaariyey lix xubnood oo kaliya.
Barkhad-ladiif M. Cumar, Hiiraan Online
[email protected]
Hargeysa, Somaliland.
