Madaxweyne Biixi oo Ciidanka Somaliland uga tacsiyeeyay geeridii ku timid taliyahoodii Cabdullaahi Fadal Iimaan
Sabti, November, 02, 2019 (HOL)-Madaxweyne Muuse Biixi ayaa tacsi u direy ciidamada kala duwan iyo bulshada Somaliland geeridda ku timid taliyihii guud ee Ciidanka Booliska Sareeye Gaas Cabdilaahi Fadal Iimaan oo xalay ku geeriyooday magaaladda Hargeysa.
Madaxweynuhu waxa uu marxuumka ku
sifeeyey halyey hawlkar ahaa oo u hagar-baxay shaqadii uu qaranka u hayey, hadh
iyo habeenna heegan adag ugu jiray adkaynta amniga, wuxuuna ku suntanaa ka
qayb-qaadashadii aas-aaska ciidanka booliska Somaliland, isagoo shaqada qaranka
ka soo bilaabay meel hoose isla markaana xilal kala duwan ka soo qabtay
ciidanka booliska kana gaadhay derejada sareeye gaas. Waxaanu geeriyooday
isagoo ah taliyaha ciidanka booliska Somaliland oo uu muddo dheer soo ahaa.
“Madaxweynaha Somaliland, Mudane
Muuse Biixi Cabdi, isagoo ku hadlaya magaciisa, ka dawladda iyo ka shacbiga
Somaliland, waxa uu dhambaal tacsi ah u dirayaa, ciidamada kala duwan ee
qaranka, gaar ahaan ciidanka Booliska Somaliland, waxgaradka, waayeelka,
aqoonyahanka, qoyska, ehelada, qaraabada, asxaabta, iyo shacbiga Somaliland ee
uu ka baxay Alle ha u naxariistee Sareeye gaas Marxuum Cabdilaahi Fadal Iimaan
oo ku geeriyooday caawa oo ay taariikhdu tahay 01/11/2019, Caasimada Somaliland
ee Hargeysa.
Waxaanu madaxweynuhu marxuumka
ALLE uga baryayaa inuu naxariistii janno ka waraabiyo, Ciidamada kala duwan ee
qaranka, gaar ahaan ciidanka Booliska Somaliland, waxgaradka, waayeelka,
aqoonyahanka, qoyska, ehelada, qaraabada, asxaabta iyo shacbiga Somaliland ee
uu ka baxayna samir iyo iimaan saadiqa ka siiyo.”ayuu ku yidhi war-saxaafadeed
ka soo baxay xafiiska madaxweynaha.
Marxuum Fadal Iimaan ayaa xilal
kala duwan ka soo qabtay ciidanka BOoliska, waxaanu la soo shaqeeyey isagoo
taliyaha ciidanka ah saddexdii madaxweyne u dambeeyey, madaxweyne Rayaale,
Siilaanyo iyo Biixi.
Marxuumka waxa maanta duhurka
lagu aasi doonna koonfurta magaaladda Hargeysa, waxaana salaadda duhur lagaga
tukan doonna masaajidka Sheekh Mustafe Xaaji Ismaciil sida uu sheegay wasiirka
arrimaha gudaha Maxmed Kaahin.
Barkhad-ladiif M. Cumar, Hiiraan Online
[email protected]
Hargeysa, Somaliland.