143 xildhibaan oo lagu eedeeyay xil gudasho la’aan iyo in ay ku talagal uga maqnaadaan kulamada Baarlamaanka
Talaado, May, 07, 2019 (HOL) – Iyadoo dhowr jeer oo hore
kooram la’aan uu u baaqday fadhi ay yeelan lahaayeen xildhibaannada Golaha
Shacabka ayuu ugu danbeyntii guddoonka Baarlamaanku sheegay in ay jiraan
xildhibaanno si ku talagal ah uga maqnaada fadhiyada baarlamaanka.
Guddoonka Golaha Shacabka ayaa maanta kulan
yeesheen kaddib warbaahinta u sheegay in 143 xildhibaan oo ku sugan magaalada
Muqdisho si ku talagal ah uga maqnaadaan kulamada Golaha Shacabka iyaga oo ku
eedeeyay xildhibaannadaa xil gudasho la’aan.
Guddoonka ayaa sheegay in meel ay ku qoran tahay
jirin in xildhibaan uu ka maqnaado kulamada Golaha Shacabka cudur daar la’aan,
waxaana uu intaa ku darray in wixii hadda ka danbeeya xildhibaannadaa la marin
doono waxa uu ka qabo xeer hoosaadka Baarlamaanka.
Hab-dhowraha Golaha Shacabka Xildhibaan Maxamed
C/llaahi Nuux ayaa sheegay in Xildhibaanada ka maqan fadhiyada guud ee
Baarlamaanka yihiin kooram buuxa oo dhan
143 Xildhibaan, madaama sida uu hadalka u dhigay fadhiga uu ku furmo 139
Xildhibaan.
Waa markii ugu horeysay oo guddoonka Golaha
Shacabka uu ku dhawaaqo tirada xildhibaannada ka maqan Golaha Shacabka ee aan
soo xaadirin kulamada iyo fadhiyada uu goluhu yeesho.
C/raxmaan Diini, Hiiraan Online
[email protected]