Munaasabad isugu jirtay taageero iyo soo dhaweyn oo lagu qabtay magaalada Beledweyne
Talaado, May, 07, 2019 (HOL) –Munaasabada oo ay ka soo qeybgaleen mas’uuliyiin ka tirsan maamulka degmada Beledweyne, Ururrada bulshada rayidka iyo qeybaha kala duwan ee bulshada ayaa lagu taageeray guddoomiyaha cusub ee Ururka dhalinyarrada dowlad gobolleedka Hirshabeelle Maxamed Cabdullaahi Buraale Raaxeeye.
Ka qeyb-galayaasha munaasabada ayaa sidoo kale
soo dhaweeyay doorka Wasiirka dhalinyarrada iyo cayaaraha Hirshabeelle
Cabdiqani Jeenyo uu ka qaadanayo hormarinta dhalinyarrada labada gobol Hiiraan
iyo Shabeellaha dhexe.
Duqa degmada Beledweyne Khadar Xassan Afrax oo
hadal kooban ka jeediyay munaasabada ayaa uga mahad celiyay Wasiirka iyo
Wasaarradiisa-ba ka shaqeynta is dhax-galka dhalinyarrada labada gobol, isaga
oo intaa ku darray in ay soo dhaweynayaan magacaabista uu sameeyay Wasiirka ee
guddoonka Ururka dhalinyarrada dowlad gobolleedka Hirshabeelle.
Qeybihii kala duwanaa ee bulshada ka qeybgashay
munaasabada isugu jirtay taageerrada iyo calleemo saarka ayaa u rajeeyay
guddoomiyaha cusub ee Ururka dhalinyarrada dowlad gobolleedka Hirshabeelle
hormar iyo in uu ka shaqeeyo sidii loo abuuri lahaa madal ay dhalinyarradu uga
wada hadli karaan mustaqbalka sidii qeyb uga noqon lahaayeen geedi socodka
siyaasadda dib u dhiska dalka.
Guddoomiyaha cusub ee Ururka dhalinyarrada maamul
gobolleedka Hirshabeelle oo ka hadlay madasha ayaa u balanqaaday dhalinyarradii
ka qeybgashay munaasabada in dhawaan la qabanayo doorashada guddoonka Ururka
dhalinyarrada gobolka Hiiraan si dhaw-na u wada shaqeyn doonaan shaqsi kasta oo
ku soo baxa doorashada.
“’Waan hubaa in ay halkan fadhiyaan dhalinyarro
firfircoon oo is badal abuuri kara, waxaan rabaa in dhamaanteen aan ka wada
shaqeyno hormarka guud ahaan dalka, gaar ahaan deegaannada Hirshabeelle, madaama
dhalinyarradu yihiin dhaf-dhabar u yihiin hormarka dal ku tallaabsado’’ ayuu yiri
Raaxeeye.
Dhawaan ayaa lagu waddaa in magaalada Beledweyne
lagu qabto doorashada guddoomiyaha Ururka dhalinyarrada gobolka Hiiraan oo uu
banneeynayo guddoomiyaha cusub dhalinyarrada dowlad gobolleedka Hirshabeelle.
C/raxmaan Diini, Hiiraan Online
[email protected]