Madaxweyne Biixi oo ka hadlay deegaanadda gobolka Sanaag ee xaaladda degdeg ah lagu soo rogay
Isniin, May 06, 2019 (HOL)–Madaxweyne Biixi ayaa fariimo u kala direy guud ahaan shacabka Somaliland, deegaanadda xaaladda degdeg ah lagu soo rogay iyo warbaahinta Somaliland.
Madaxweyne Biixi ayaa dadweynaha
ugu baaqay inay nabadda ilaaliyaan oo wada jirka umadda ka shaqeeyaan, waxaanu
ka hadlay xaaladda ka taagan deegaanadda Gar-adag, Ceel Afweyn iyo deegaanada
hoos yimaado oo dhowaan lagu dilay laba sarkaal oo ciidanka ka tirsan, waxaanu yidhi “Waxan idin xasuusinayaa walaalayaal inay nabadgelyadu tahay
tiir-dhexaadka aynnu ku dhisannahay, qof walibana uu halkiisa uga guntado.
Saddexda degmo ee imika dhibaatadu ka jirto oo dad badani si qaldan uga bixiyeen
in nabadgelyada la sugo, waxan leeyahay marka ay dhibaato dhacdo waxa waajib
saaran yahay qaranka, xukuumadda iyo shacabkaba in nabadgelyada gacmaha oo dhan
la isugu geeyo, ciidamada halkaas loo dirayna waxa qudha ee ay qabanayaan waa
inay ilaaliyaan nafta iyo hantida ummadda Somaliland iyo amniga guud, dalkana
inay wax u taraan mooyaane wax hadimo ah ma wadaan.”
Madaxweynuhu wuxuu sheegay in
ciidamada ka hawlgalaya deegaankaasi ay ilaalinayaan xuquuqda iyo xoriyadda
dadka shacabka ah, waxaanu tilmaamay
shaqooyinka ay halkaasi ka qaban doonaan “ciidamadu waxa ay nabadgelyada
sugayaan iyaga oo xorriyadda iyo xuquuqda qofka ilaalinaya, qofka dambiilaha
ahna gacan adag ku dhigaya oo ka qabanaya ummadda inaanu fidnaynin, sidaas
darteed shacabka waxan ka codsanayaa dhammaantii gaar ahaan degmooyinkaas inay
si fiican ula hawlgalaan ciidamada qaranka ee ku hawllan sugidda amniga.
Gobolladaas iyo degmooyinkaas dadka deggenna waxan leeyahay walaalayaal wax
walba nabadda ka horraysee aynnu nabadda u wada guntanno, nin meel dheer
telefoon kaga soo hadla oo aan dantaada eegayninna yaannu fidno ina gelinine
nabadda halla xejiyo.”
Ugu dambayntii waxa uu
madaxweynuhu baaq u diray warbaahinta kala duwan ee dalka ka hawlgasha, waxana
uu kula dardaarmay inay bulshada u tebiyaan warar xanaf tiran oo aan bulshada
dhexdeeda fidno ka dhalinaynin, islamarkaana ay xil iska saaraan sidii ay isugu
soo jiidi lahaayeen guud ahaanba shacabka Somaliland.
Barkhad-ladiif M. Cumar, Hiiraan
Online
[email protected]
Hargeysa, Somaliland