Isniin, May, 06, 2019 (HOL)- Iyadoo guud ahaan marka la
eego dunida Muslimka iyo inta badan dhulka Soomaalida maanta u tahay maalinta
1aad ee bisha Barakeysan ee Ramadaan, ayaa dhinaca kale waxaa jirta in qeybo ka
mid ah gobollada dhexe ee Soomaaliya aan maanta laga sooneyn.
Mas’uuliyiin ka tirsan maamulka degmada
Dhuusa-Mareeb ee bartaha Soomaaliya ayaa ku dhawaaqay in maalinta berri ah ay ku
beegan tahay 1da bisha Ramadaan, iyaga
oo sheegay in ay maanta kaamilayaan [Buuxinayaan] 30ka bisha Shacbaan.
Guddoomiyaha guddi loo xil saaray xaqiijinta iyo
raadinta Bisha Ramadaam Sheekh Cali Nuur Cilmi ayaa sheegay in maanta aan laga
soomeyn deegaannada Galmudug guud ahaan , isla markaana aysan arkin Bisha Ramadaan.
Khilaafka inta badan ka dhashay bilashada bisha
Barakeysan ee Ramadaan ayaa caado ka ah qeybo ka tirsan dhulka Soomaalida gaar
ahaan gobollada dhexe, sababta ugu weyn ayaa lagu tilmaamayaa kala duwanaashaha
madaahibta ay kala aaminsan yihiin Ururrada diimeedka ee dalka ka jira.
Sidoo kale maalinta Ciidda ayaa ka mid ah maalmaha sidan oo kale leysugu khilaafo, gaar ahaan marka la eego deegaannadii ay horay u maamuli jireen Ururka Ahlu Sunna Waljameeca oo maalin dib uga dhaca tukashada Salaada Ciidda.
C/raxmaan Diini, Hiiraan Online
[email protected]
