Sabti, May, 04, 2019 (HOL)- Magaalada Garoowe ee
xarunta dowlad gobolleedka Puntland waxaa galabta gaaray madaxweynaha dowladda
Soomaaliya Maxamed Cabdullaahi Farmaajo oo maalinta berri ah halkaa ka furaya
shirka dowladda federaalka iyo maamul gobolleedyada.
Madaxweynaha dowlad gobolleedka Puntland Siciid Cabdullaahi Deni iyo
mas’uuliyiin kale oo ka tirsan maamulkiisa ayaa ku soo dhoweeyay wafdiga uu
horkacayay Mdaxweyne Farmaajo garoonka Diyaaradaha Garoowe.
Waxaa horay u sii joogay Garoowe ra’iisal
wasaaraha xukuumadda Soomaaliya Xassan Cali Kheyre iyo guud ahaanba madaxda
dowlad gobolleedyada dalka Soomaaliya.
Shirkan oo ay marti-galineyso Puntland ayaa looga
hadli doonaa qodobo dhowr ah oo u badan guud ahaanba marka la eego siyaasada
dalka iyo xiriirka u dhaxeeya dowladda federaalka iyo maamul gobolleedyada oo
waayadii ugu danbeeyayba aan wanaagsaneyn.
Sidoo kale shirka maalinta berri ah ayaa imanaya
xili inta badan dowlad gobolleedyada dalka qaadaceen shirka Dooorashooyinka
Qaranka oo ay meel mariyeen Golaha Wasiirrada Xukuumadda Soomaaliya, iyaga oo
sharcigaa ku tilmaamay mid loogu marmarsiyoonayo muddo korarsi ay sameystaan
madaxda xiligan marka uu waqtigood dhamaado.
C/raxmaan Diini, Hiiraan Online
[email protected]
