Sabti, May, 04, 2019 (HOL)- Magaalada
Garoowe waxaa lagu wadaa in uu maanta ka furmo shir halkaa ay ku yaalanayaan
madaxda dowladda federaalka iyo dowlad gobolleedyada, iyadoo saacadaha soo
socda magaalada Garoowe laga sugayo madaxweynaha dowladda Soomaaliya Maxamed
Cabdullaahi Farmaajo.
Ra’iisal wasaaraha xukuumadda
Soomaaliya Xassan Cali Kheyre iyo madaxda dowlad gobolleedyada dalka ayaa
maalintii shalay gaaray Garoowe oo uu ku soo dhaweeyay madaxweynaha maamul
gobolleedka Puntland Saciid Cabdullaahi Deni oo markii horeba la lahaa
martiqaadka shirka.
Shirkan maanta ka furmayo magaalada Garoowe ayaa
ku soo beegmaya xili xasaasi ah oo siweyn guud ahaan marka la eego loogu kala
aragti duwan yahay geedi socodka siyaasada dalka iyo doorashada marka la gaaro
sanadka 2021 oo durbaba khilaaf xoog leh uu ka abuurmay kaddib meel marintii
Golaha Wasiirradda ee shirka Doorashooyinka oo ay dood adag ka keeneen madaxda
dowlad gobolleedyada qaarkood iyo Xisbiyada mucaaradka.
Sidoo kale shirkan ayaa imanaya
xili maamul gobolleedyada qaarkood ku eedeynayaan dowladda dhexe in ay
fara-galin ba’an ku heyso arrimahooda gudaha, iyadoo madaxweynaha maamulka
Jubbaland uu dhawaan sheegay in amni darrada ka jirta Kismaayo laga soo
abaabulo magaalada Muqdisho.
Dowladda Federaalka iyo dowlad goboleedyada ayaa
muddo sanad ah wax shir ah yeelan, tan iyo shirkii Baydhabo ka dhacay bishii
June ee sanadkii hore, waxaana labo jeer oo is xigtay baaqday shir uu isugu
yeeray madaxda dowlad gobolleedyada dalka madaxweyne Maxamed Cabdullaahi
Farmaajo.
C/raxmaan Diini, Hiiraan Online
[email protected]
