Jimco, May, 2019 (HOL)-Madaxweyne Muuse Biixi ayaa xafiiskiisa ku qaabiley safiirka Sucuudiga ee Soomaaliya, Dr Mohammed Abdi-kani Khayat oo booqasho ku yimid Somaliland.
Kulankaasi waxa lagaga wada
hadlay sidii dawladda sucuuudigu gacan uga geysan lahayd gurmadka abaaraha soo
foodsaray qaar ka mid ah gobolada Somaliland, isagoo safiirku balan qaaday inay
ka dawlad ahaan ay qayb muhiima ka qaadan doonaan.
Waxa kale oo kulankaasi lagaga
wada hadlay ganacsiga iyo dhoofka xoolaha sidii ay uga wada shaqayn lahaayeen
labada dal, iyadoo kulankaas lagu soo qaaday sidii xayiraada xoolaha saaran
laga qaadi lahaa, shuruudaha dawladda sucuudigu qabtana looga jawaabi lahaa.
Sidoo kale waxa kulanka lagu
lafo-guray arrimo badan oo salka ku haya xidhiidhka labada dal gaar ahaan
dhinaca amniga, xoojinta xidhiidhka ganacsi ee labada dhinac, isu socodka
muwaadiniinta labada dal iyo arrimaha xajka iyo diinta sida lagu sheegay
War-saxaafadeed uu ku saxeexan yahay afhayeenka madaxweynaha Maxamuud Warsame.
Safiirku wuxuu Somaliland ku
sugnaan doonaa maalmo kooban isagoo kulamo la qaadan doona qaar ka mida
wasaaraddaha, horumarinta Maaliyada, xannaanada xoolaha iyo horumarinta
Kalluumaysiga, iyo ganacsiga, wershadaha iyo dalxiiska Waxaana madaxweynaha
kulankaasi ku wehelinaayey wasiirka wasaaradda Horumarinta Maaliyadda iyo
wasiir ku xigeenka wasaaradda arrimaha dibeda iyo iskaashiga caalamiga ah.
Barkhad-ladiif M. Cumar, Hiiraan Online
[email protected]
Hargeysa, Somaliland.
