Guddida joogtada ee golaha Wakiilada Somaliland oo sharci daro ku tilmaamay xadhiga xildhibaan Dhakool
Axad, May 12, 2019 (HOL)- Guddida joogtadda ah ee golaha Wakiilada Somaliland ayaa diiday dalab uga yimid xeer ilaalinta qaranka inay xasaanadda ka qaadaan xildhibaan Maxamed Axmed Dhakool oo ciidamadda boolisku xabsiga u taxaabeen.
Sidoo kale, waxay sharci daro ku
tilmaameen xadhiga xildhibaanka, isla markaana waxay xaaraantimeeyey in
xildhibaan aan faldambiyeed faraha kula jirin oo xasaanadii qaranka huwan in la
xidho, waxa kale oo ay hambalyeeyeen maxkamaddaha dalka oo sheegay in aanay
qaadi Karin dacwada xildhibaan aan xasaanadii laga qaadin iyo in aanay
xadhigiisa xalaalayn Karin.
Xildhibaan Garyaqaan Maxamed
Jaamac oo ka tirsan guddida joogtadda ee golaha Wakiiladda oo afka guddidaasi
ku hadlayey ayaa yidhi “ xeer ilaalintu waxay noo soo qortay waraaq ay nagu
ogaysiinayso xadhiga xildhibaanka, marka la qabanayo xildhibaan waxay leedahay
dariiqa loo maro oo dastuurku tilmaamay,
waxaana sheegaya qodobad kala ah 49 iyo
79, labadan qodob waxay tilmaamayaan xubinta baarlamanka ah ee dambi gasha
wixii laga yeelayo, waana laba siyood oo kala ah hadii uu dambi kula jiro faraha waa la
qabanayaa, xafiiska xeer ilaalintu waraaqda ay noo soo qoreen laba ujeedo ayey
xambaarsanayd, ujeedada kowaad waxay sheegen inay ninkaasi ku qabteen isagoo
dambi faraha kula jira, iyo arrinta labaad oo ah waxaan idin sheegaynaa in
dambi ninkaasi galay aanu baadhayno, taasi waxay noo cadaysay in aanay jirin
wax dambi ah oo uu faraha kula jiray markii la qabanayey, waxaanu eegnay
talaabooyinkii ay qaadeen ciidanka iyo xeer ilaalintu waxaana ogaanay in aanay
ahayn dariiqa loo maray xidlhibaanka mid sharciga iyo dastuurka waafaqsan .”
Guddida joogtu waxay ku baaqeen
in xildhibaanka xoriyadiisii loo soo celiyo iyo in sharciga loo hogaansamo
hadii kale ay keeni karto cawaaqib xun hadii la ixtiraami waayo sharciga iyo
dastuurka.
Barkhad-ladiif M. Cumar, Hiiraan Online
[email protected]
Hargeysa, Somaliland.
