Ardey Aragga La oo markii ugu horeysay ka qeybgaleysa Imtixaanka Shahaadiga ee heer Qaran
Sabti, May, 11, 2019 (HOL) – Waxaa
maanta sirasmi ah u bilaabanaya imtixaankii Shahaadiga ahaa ee dugsiyada sare
ee dalka, kaasi oo ay qaadayso dowladda Federaalka Soomaaliya.
31,500 oo Arday ayaa u fariisinaya
Imtixaankaasi, taasi oo ah tiradii ay horey u shaacisay wasaaradda waxbarashada
Soomaaliya.
Waxaa markii ugu horeysay imtixaanka mideysan ee
dugsiyada sare ee Dowladda Soomaaliya ka qeybgalaan arday Aragga la' oo gaarayo illaa
28 arday oo isugu jiray Gabdho iyo Wiilal.
22 kamid ah Ardaydaas araga la' ee maanta
Imtixaanka u fadhiisatay ayaa waxa ay kasoo qalin jabiyeen Dusiga indhoolayaasha
ee Al-Nuur kaa soo ay gacanta ku heyso Shirkadda Hormuud qeybteeda Hormuud
Foundation.
Guddoomiyaha hey’adda Hormuud Foundation
Cabdullaahi Nuur Cismaan oo sharraxaad ka bixiyey xaaladda Arday ayaa sheegay
aydaydu ay marxalad adag wax kusoo barteen, wuxuu intaas ku daray in School-ku
uu ka kooban yahay Dugsi Hoose Dhexe oo kaliya sidaas daraadeedna ay Hey’addu
bixiso Kharashka & lacagaha ay Dugsiyada sare ku dhigtaan, wuxuuna intaas
ku daray in sanadkan la hir gelin doono Dugsi Sare, uuna haatan dhismihiisu ka
socdo Deegaanka Daaru-salaam.
Ra'isul wasaare ku xigeenka dalka Mahdi Maxamed
Guuleed oo kormeer ku tagay goobaha Imtixaanka ka socdo ayaa Shirkadda Hormuud
uga mahadceliyey sida ay uga shaqeysay inay Maanta imtixaanka soo fadhiistaan
arday badan oo indhoolayaal ah kuwaas oo wax kusoo bartay Machadka
Indhoolayaasha ee Al-Nuur oo ay kafaala qaaday Shirkadda Hormuud.
Machadka Al-Nuur ee Indhoolayaasha ayaa waxaa wax
ku barto arday badan oo indhoolayaal ah kuwaas oo ku jiro heerarka Hoose, Dhexe
iyo Sare ee waxbarashada.
C/raxmaan Diini, Hiiraan Online
[email protected]