Sabti, May, 11, 2019 (HOL) – Baarlamaanka federaalka ah ee Soomaaliya oo maanta yeeshay kulankooda 13-aad ee kalfadhiga shannaad ayaa akhrinta 1-aad marsiiyey hindise sharciyeedka dakhliga oo ay soo diyaarisay wasaaradda maaliyadda,waxaana golaha u akhriyay wasiirka maaliyadda ,Cabdiraxmaan Ducaale Bayle.
Kulanka ayaa sidoo kale waxaa ay xildhibaannada Akhrinta seddaxaad marsiiyeen hindise sharciyeedka shirkadaha ,waxaana xildhibaannada u faah faahiyay Xildhibaan Maxamuud Cabdiraxmaan Beene Beene oo ah guddoomiyaha guddiga ganacsiga,dhaqaalaha,warshadaha iyo maalgashiga ee golaha shacabka.
Xildhibaannada ayaa cod geliyay hindise sharciyeedka shirkadaha ,waxaana haa ku ogolaatay 142-Xildhibaan oo aheyd tirada guud ee xildhibaannada kulanka joogay sida uu natiijada ku dhawaaqay kusimaha guddoomiyaha golaha shacabka ahna guddoomiye ku-xigeenka koowaad ee golaha shacabka Cabdiwali Sheekh Ibraahim (Muudey) oo kulanka soo xiray.
Dhinaca kale, xildhibaannada ayaa furitaankan kulanka waxa ugu horreyn uu ku-simaha guddoomiyaha golaha shacabka ahna guddoomiye kuxigeenka koowaad ee golaha shacabka , Cabdiwali Sheekh Ibraahim (Muudey) uu ka tacsiyadeeyay geeridii Xaaji Cabdikariin Xuseen Yuusuf (Cabdi waraabe) oo shalay ku geeriyooday magaalada Hargeysa.
Iman Mohamed Jama, Hiiraan Online
[email protected]