Gudoomiyaha golaha Wakiilada Somaliland oo sharci daro ku tilmaamay xadhiga xidlhibaan golahooda ka tirsan oo xabsiga loo taxaabay
Sabti, May 11, 2019 (HOL)–Guddoomiyaha golaha wakiillada baarlamaanka Somaliland Baashe Maxamed Faarax, ayaa xadhigii xildhibaan Maxamed Dhakool ku tilmaamay mid sharci daro ah, isla markaana iyadoo xasaanidii laga qaadin la iska xidhay.
Sidoo kale, gudoomiye Baashe waxa
uu sheegay in aragtidii uu xildhibaanku kaga hadlay 18 May ay ahayd mid isaga
uun ku kooban, balse ay tahay maalin qaran oo ummada Somaliland ku heshiisay in
maalintaasi gaar u ahaato madax banaanida Somaliland.
Gudoomiyaha golaha Wakiilada Baashe
Maxamed Faarax ayaa sheegay mar uu isku
dayey inuu xabsiga ku soo booqdo in loo diiday, haseyeeshee uu waraaqo u qoray
hay’adaha ay khuseyso xadhigiisa, isagoo xusay inuu u sheegay in sifaha loo
maray xadhigiisa ay khalad ahayd oo aan la xidhi Karin xildhibaan aan
xasaanidii laga qaadin.
"Isagoo xasaanaddii laga
qaadan oo aan golaha wakiillada lasoo waydiisan ayaa gurigiisii loogu dhacay
xaaskiisii iyo carruurtiisii oo huruda, anigoo guddoomiyihii baarlamaanka ahna
CID'du waxay ii diidday inaan arko" ayuu yidhi Guddoomiye Baashe.
Xildhibaan Dhakool ayaa maalinta
18 May ku tilmaamay maalin cid gaar ahi leedahay, taasina waxay keentay in lagu
eedeeyo inuu shacabka kala qaybinayo sida ay ku doodeen ciidanka amniga ee
xabsiga u taxaabay.
Xildhibaanka saaka ayaa la keenay
maxkamadda gobolka Maroodi jeex, haseyeeshee maxkamadu way diiday inay ka
garnaqdo xildhibaan aan xasaanidii laga qaadin in maxkamada la keeno, taasina
waxay keentay in dib loogu celiyo xarunta dambi baadhista ee C.I.D oo uu ku xidhan yahay.
Barkhad-ladiif M. Cumar, Hiiraan
Online
[email protected]
Hargeysa, Somaliland
