Jimco, May, 10, 2019 (HOL) - XildhibaanXaaji
Cabdikariim Xuseen (Xaaji Cabdi Wareebe) oo ka mid ahaa xildhibaanada golaha
Guurtidda ayaa maanta ku geeriyooday cisbitaal ku yaalla magaaladda Hargeysa.
Xaaji Cabdi Waraabe wuxuu ahaa oday ka soo
shaqeeyey nabadda iyo isku ururada dadka,waxaanay taariikhdiisa nabadeed ka soo
bilaabantaa markii isagoo yar Aabihii la dilay uu saamaxay kuwii dilay.
Xaaji Cabdi Waraabe oo ku suntanaa astaanta
nabadda iyo walaaleynta dadka waxa uu taariikhda ku gallay markii uu 15 jir
gaadhay in lagula taliyey inuu aabihii usoo aaro oo Qori loo dhiibay,isla
markaana loo geeyey ninkii lagu eedeynayey inuu dilay aabihii, haseyeeshee uu
ninkii aabihii dilay inta uu qorigii u geeyey u sheegay sababta uu ugu yimid
inuu dilo balse aanu doonayn inuu aabihi u aaro, taasina waxay keentay in
odaygii uu badbaadiyey uu inantiisii siiyo, sidaasna labaddii reer qoys walaalo
ku noqdeen.
Taariikh badan buu leeyahay uu nabadda ugu
hiilinayo, ilaahay ha u naxariisto, waxa uu dunidda ka tagay maalin khayr badan
oo ah Jimce iyo Ramadaan wada socda, waana astaamaha lagu garto dadka ehelu
janadda ah.
Dhinaca kale, madaxweynaha Somaliland ayaa tacsi
u direy qoyskii iyo qarankii uu ka baxay marxuum Xaaji Cabdi Waraabe.
“Madaxweynaha Somaliland, Mudane Muuse Biixi
Cabdi, isagoo ku hadlaya magaciisa, ka dawladda iyo ka shacbiga Somaliland,
waxa uu dhambaal tacsi ah u dirayaa, golayaasha wakiilada, guurtida, madaxda
dhaqanka, waxgaradka, waayeelka, aqoonyahanka, qoyska, ehelada, qaraabada,
asxaabta iyo shacbiga Somaliland ee uu ka baxay Alle ha u naxariistee Marxuum
Xildhibaan, oday, Xaaji Cabdikariin Xuseen Yuusuf (Cabdi-waraabe) oo ku
geeriyootay maanta oo ay taariikhdu tahay 10/05/2019, Magaalada Hargeysa.
waxaanu madaxweynuhu tacsi taa la mida u dirayaa dhammaan tafiirta Reer Xaaji
Cabdikariim Xuseen Yuusuf meel ay kala joogaanba.”ayaa lagu yidhi qoraal ka soo
baxay madaxtooyadad.
Waxaanu intaas ku daray “Madaxweynuhu waxa uu
marxuumka ku sifeeyey Rukun ka mida Rukamada Qaranka Somaliland ku aas-aasmay,
tusaale fiicana u ahaa dhammaan hal-doorka Somaliland, tan iyo maalintii uu
kaalin qaadayna waxa lagu yaqaanay diin jacayl dad ururin iyo daacadnimo,
wuxuuna caan ku ahaa nabadda iyo isu keenida bulshada isagoo saaxada ku soo
galay odaynimo geyiga Somaliland wada gaadhay Marxuum xaaji Cabdikariim xuseen
Yuusuf, wuxu ahaa oday halgan adag u soo galay aas-aaska Jamhuuriyadda
Somaliland wuxuuna ka mid ahaa waayeelkii tirada yaraa ee u guntaday nabadeynta
iyo dawlad dhiskii qaranka, wuxuu ahaa tiir ka mida aqalka guurtida Somaliland,
wuxuuna ku suntannaa maalin iyo habeen inuu u hagar baxo geediga nabadda
Somaliland, isagoo ahaa musdanbeed arrin kasta oo murugta loola noqdo, u
odayeynta toosinta iyo tanaasulka siyaasiyiinta dalka, madaxdii qaranka soo
hoggaamisayna uu la garab taagnaa talo iyo tusaale, waxaana lagu xasuusan
doonaa samo-talis talo suuban. Ruugcadaa u soo rafaaday rumaynta qaranka
Somaliland oo uu baal dahab ah ka galay sooyaalka taariikhdiisuna ku xusnaan
doonto.
Madaxweynuhu waxa uu marxuumka ALLE uga baryayaa
inuu naxariistii janno ka waraabiyo, golayaasha wakiilada, guurtida, madaxda
dhaqanka, waxgaradka, waayeelka, aqoonyahanka, dhammaan reer xaaji.
Barkhad-ladiif M. Cumar, Hiiraan Online
[email protected]
Hargeysa, Somaliland.