Taliyeyaasha ciidamada Militeriga iyo Booliska oo ka hadlay xaaladda degdeg ah ee lagu soo rogay deegaano hoos taga gobolka Sanaag
Arbaco, May, 01, 2019 (HOL)- Taliyeyaasha ciidamada Militeriga iyo Booliska
Somaliland ayaa sheegay inay fulinayaan amarkii madaxweynaha ee xaaladda degdeg
ah ku soo rogay degmooyinka Gar-adag, Ceel afweyn iyo Ceerigaabo.
Labada taliye waxay sheegeen inay ku daba jiraan
dableydii dilka u gaystay laba sarkaal oo ka tirsanaa ciidamadda, waxaanay
sheegeen inay awoodii maamul iyo amnigaba uu ciidamadu la wareegay,isla
markaana ciidanka awood loo siiyey inay xayiri karaan dhaqaaqa gaadiidka,isla
markaana talaabi ka qaadi karaan cid kasta oo ka hor timaadda hawlgalada
ciidamadu wadaan.
“Saddexda degmo ee ciidamada qalabka sida
hawlgalo balaadhan ayey ka wadaan sidii falkii lagu dilay laba sarkaal u
dhacay, ciidamadu way xayiri karaan dhaqdhaqaaqa Gaadiidka cid kasta oo looga
shakiyo inay nabadgalyada khatar ku tahay cida wal oo is hortaagta ama ficilo
ama borobogaadho kula kacday talaabo laga qaadaya, degmo kasta waa maamulkeeda
iyo hawgalkeeda gacanta ku haynaya Ciidamada qaranka. Shacabka gobolkaasi ku
nool waa inay la shaqeeyaan ciidanka, waa in loo hogaansamaa hawlgalada socda
ee nabada deegaankaasi lagu sugayo”ayuu yidhi taliyaha guud ee Booliska Fadal.
Sidoo kale, Gen:Nuux Taanni ayaa sheegay in
amniga nabada deegaankaasi gacanta ku haynayaa muddo saddex bilood,isla
markaana warbaahinta ka codsaday inay la shaqeeyaan oo warar amniga waxyeelaya
iska ilaaliyaan.
Barkhad-ladiif M. Cumar, Hiiraan Online
[email protected]
Hargeysa, Somaliland.
