Shirkadda Facebook oo ay soo foodsaartay cilladdii ugu waynayd taariikhda
Khamiis, Maarso, 14, 2019 (HOL)- Barta Facebook ee ay bulshadu ku xiriirto ayay
soo wajahday ciladdii ugu waynayd taariikhda, iyadoo adeegyadii ugu mihiimsanaa
ay cilado galeen, dadka dunida kala jooga ee isticmaalana ay adeegsan waayeen
Arbacadii.
Markii ugu dambaysay ee cilad baaxadan ku dhaw ay soo wajahdo waxay ahayd
sannadkii 2008, markaas oo dadka isticmaala ee dunidu ay ahaayeen 150 milyan
halka ay hadda bil kaste ka isticmaasho 2.3 bilyan oo ruux.
Cilladan ayaa saamaysay adeegyada ugu waawayn Facebook sida labada App ee
Messenger iyo WhatsApp oo fariimaha la isaga diro iyo Instagramka oo sawirrada
lagu wadaago.
Wali lama shaacin waxa sababay ciladdan.
"Waxaan ka war qabnaa in dadka qaar ka mid ah aysan hadda isticmaali
karin Facebook iyo App-ka ay isku bahda yihiin" ayaa lagu yiri war qoraal
ah oo ka soo baxay Facebook.
"Waxaan ka shaqaynaynaa sidii ciladdan loo soo af jari lahaa sida ugu
dhakhso badan".
Shirkadda oo ka jawaabaysa warar la isla dhex maray oo sheegaya in shirkaddu
ay adeegga u joojisay si ay u baajiso weerar dhanka Internetka ah oo lagu soo
qaaday, ayaa sheegtay in arrintu aysan sidaas ahayn.
Waxaa la qiyaasayaa in cilladani ay billaabatay 16:00 GMT ama 7:00 fiidnimo
ee saacadda Bariga Afrika.
Qaar ka mid ah dadka isticmaala Facebook ayaana billaabay in ay ka cawdaan
in aysan waxba ku qori karin ama sawirro dadka la wadaagi karin.
Dadka Instagram-ka isticmaala ayaa iyaguna awoodi waayay in ay bogga
cusboonaysiistaan si ay sawirro cusub u arkaan
Xigashada Warkan BBC
