Somaliland oo diiday shuruudo cusub oo uu ku soo kordhiyey Sucuudigu dhoofka xoolaha Soomaalida
Isniin, June, 24 2019 (HOL)- Wasiirka Xanaanada xoolaha iyo
horumarinta Kalluumaysiga Xasan Maxamed Gaafaadhi, ayaa sheegay in shuruudo
cusub ay ku soo kordhisay dawlada Sucuudigu, taas oo ay ku soo kordhiyeen in
waraaqda caafimaadka xoolaha laga qaadanayo dawlada Soomaaliya.
Wasiir Gaafaadhi ayaa sheegay in
hadii sidii hore ku dhoofi waayaan xoolaha Somaliland inay gabi ahaanba joojin
doonaan inay xoollo u dhoofiyaan Sucuudiga, taas oo uu sheegay inay isla
qaateen ganacstadda xoolaha dhoofiya iyo xukuumaddu.
Sidoo kale, waxa uu xusay inay
jiraan dad baryahanba waday inay lacag ku qaataan waraaqda caafimaadka oo
dhabarka galinayey Soomaaliya si ay xafiisyo uga furtaan Somaliland iyo
Soomaaliya.
“Sucuudigu Wuxuu keenay waraaq
muujinaysa inay xoolihii xajku fasax yihiin, warqadaasi waxay wadataa shuruudo
cusub intooda badan tahay shuruudo caafimaad, shuruudahaasi waa qaar jiri jirey
iyo qaar lagu soo kordiyey, si kastaba ha ahaaatee, waxa waajib ah in shruudah
caafimaad wasaaradu dhamaystirto oo ay buuxiso si xoolahaasi ugu gudbaan
wadanka Sucuudiga.”ayuu yidhi wasiir Gaafaadhi.
Isagoo ka hadlaya shruuda cusub
waxa uu yidhi “Hal shuruudda ah oo cusub ayaa sanadkan ku jira, waxa jiray rag baryahanba
wareegayey oo qorshahoogu ahaa inay lacag siyaasado ah ka dul qaadaan xoolaha
iyagoo u maraya qaab ururo ah oo fayo dhawrka ilaaliya, iyagoo dawladda
Fadaraalka Soomaaliay dhabarka galiyaan ay ka helaan rusqado u saamaxaya inay
ku qaataan waraaqda caafimaadinta, waxaana sucuudigu soo saaray in waraaqda ugu
dambaysay ee caafimaadinta xoolaheena ay bixin doonto Soomaaliya.”
Wasiirku waxa uu sheegay in
haddii qasab lagaga dhigo waraaqdaasi Soomaaliya inay gabi ahaanba joojin
doonaan xoolihii ay u dhoofin jireen Sucuudiga, maadaama oo Somaliland tahay
dal madax banaan oo aan hoos tagin Soomaaliya. “Waxaanu marka hore u sheegayna
in Somalilnad iyo Soomaaliya tahay laba dal oo kala madax banaan oo aanay waxba
iskaga jirin, waa marka labaad ee hore umay dhicin in waraaq Xamar laga keenay
ay xoolaheenu ku dhoofaan, hadana mid dhacaysa maaha, waxaan cid walba u sheegayna in aanay
dekadaheena ka dhoofi doonin cid sidata waraaq laga soo qaatay Soomaaliya,
xoolahenu ama sideenii hore bay u dhoofi ama waynu haysanayna oo awalba way
xidhnaayeen oo marka xajka uun baa la furi jirey uun, qaranimada ku iibsan
mayno iibka xoolaheenna, waxaana arrinkaasi isla qaadanay ganacsatada xoolaha
dhoofiya iyo xukuumadaba”ayuu raaciyey hadalkiisa.
Barkhad-ladiif M. Cumar, Hiiraan Online
[email protected]
Hargeysa, Somaliland.
