Taliska Booliiska Soomaaliyeed oo faah faahin ka bixiyay Qaraxyadii maanta ka dhacay Muqdisho
Sabti, June, 15, 2019 (HOL) – Taliska Ciidanka
Booliska Soomaaliyeed ayaa ka warbixiyay labo Qarax oo maanta ka dhacay magaalada
Muqdisho kuwaasoo geystey qasaare isugu jira dhimasho iyo dhaawac.
Taliyaha Ciidanka Booliska Soomaaliyeed S/guuto
Bashiir Cabdi Maxamed oo warbaahinta kula hadlay magaalada Muqdisho
ayaa sheegay in labada qarax ay ka kala dhaceen agagaarka Taaladda Sayidka iyo
meel ku dhow Hotel Afriik gaar ahaan Barta-Kontaroolka ee wadada aadda garoonka
diyaaradaha Aadan Cadde ee magaalada Muqdisho.
“Maanta waxaa Xamar ka dhacay labo Qarax oo is
xig-xigay,kan koowaad wuxuu ka dhacay taalada sayidka agagaarkeeda,waxaa ku
dhintay sagaal qof,waxaa ku dhaawacmay 25-Qof,Qaraxa labaad ayaa wuxuu ka
dhacay agagaarka Hotel Afrik gaar ahaan meel ku dhow barta-Kontaroolka ee
wadada aada Airport-ka, waxaa ku dhintay qofkii waday gaariga, halka la
qabtay ninkii waday gaarigii qarxay oo ciidanka Booliska ay hadda gacanta ku
hayaan,” ayuu yiri Taliyaha Ciidanka Booliska Soomaaliyeed Bashiir Cabdi
Maxamed Ameeriko.
Sidoo kale, taliyaha wuxuu sheegay in labada gaari ee qarxay ay ku raad joogeen
ciidanka,islamarkaana iyagoo eryanaya ay qarxeen,waxaana gaariga qaraxa
Ciidanka ku soo wargeliyay qof shacab ah.
Ugu dambeyntii,Taliyaha Ciidanka Booliska
Soomaaliyeed Bashiir Cabdi Maxamed Ameeiko ayaa ugu baaqay shacabka
Soomaaliyeed iney la shaqeeyaan ciidanka amniga lana wadaagaan xogaha horseedi
kara in gacanta lagu soo dhigo dhagarqabayaasha caadeystay daadinta dhiiga
shacabka Soomaaliyeed ee aan waxba galabsan.
