Dowladda Soomaaliya oo ka hadashay dadkii rayidka ahaa ee lagu laayay magaalada Gaalkacyo
Sabti, June, 15, 2019 (HOL)-Dowladda Soomaaliya ayaa si adag uga hadashay dil magaalada Gaalkacyo loogu geystay 9 ruux oo ahaa dad deegaan ahaa ka soo jeeda maamulka Koonfur Galbeed Soomaaliya.
Wasiirka Wasaaradda Warfaafinta Soomaaliya Maxamed Cabdi Xayir
Maareye ayaa sheegay in falkaasi uu yahay Mid naxdin badan, islamarkaana
ay baari doonaan sidda ay wax u dhaceen.
Waxaa uu sheegay in gacanta lagu soo dhigi doono Cidii ka dambeysay
falkaasi, islamarkaana maamulka Galmudug uu ugu baaqayo in ay gacanta
kusoo dhiggaan dambiliyeyaasha.
Maamulka Koonfur Galbeed oo dhankiisa ka hadlay dhacdadan ayaa dalbaday in sida ugu dhaqsiyaha badan cadaallada loo horkeeno dadkii ka danbeeyay dilka 9 ruux ee ka soo jeeday deegaannada Koonfur Galbeed.
Saraakiisha ciidamada Galmudug ayaa sheegay in dilka dadkaasi uu yimid ka dib markii Kooxo hubeysan ay Magaalada Gaalkacyo ku dileen Sarkaal ka tirsan Ciidanka Nabad suggida Galmudug, islamarkaana dadka degaanka ay ceyradeen labo ka mid ah Kooxihi dilka geystay ka dibna gurigii ay galeen laga soo saaray 10 ruux ayna dileen 9
ka mid ah Koox deegaanka ah oo ka soo jeeday deegaannada Koonfur Galbeed.
C/raxmaan Diini, Hiiraan Online
[email protected]
