Maxkamada Racfaanka : Talaabo ayaa laga qaadayaa dadka dacwadahooda ku soo bandhigga baraha bulshada
Sabti, Feberaayo, 16, 2019 (HOL)-
Guddoomiyaha maxkamada Racfaanka gobolka
Banaadir Abshir Cumar Cabdullaahi oo shir jaraa’id ku qabtay magaalada Muqdisho
ayaa sheegay in ay sharciga la tiigsan doonaan sida uu hadalka u dhigay dadka
baraha bulshada ku soo bandhigga cabashadooda la xiriirta kiisaska dacwadaha hor yaala maxkamada ama
laamaha cadaallada dalka.
Wuxuu sheegay in ay tahay arin
danbi weyn ah in baraha bulshada lala aado sida uu hadalka u dhigay kiisas ay
ku howlan yihiin maxkamadaha dalka iyo laamaha cadaallada sidii go’aan looga
gaari lahaa, iyaga oo taa ula jeeda sida uu hadalka u dhigay sumcad dil iyo in
lagu ceebeeyo hay’adda garsoorka dalka.
” Maanta laga bilaabowaxey noqon doontaa cidii ka
dacwooto oo Social mediayaha soo dhigto kiis ka socda Maxkamada, In kiiskiisana
cadaalad laga gaari doono oo meel la dhigi doono, basle ay ka hor mari doonto
in kiis ciqaab ah isaga lagu soo oogo, hay’daha baarista loo diro, Sababta uu
ka lahaa iyo ula jeedka uu u sameeyay Sumcad dilistaas in la baaro, isla
markaana Maxkamada Awoodo u leh la horgeeyo” ayuu yiri garyaqaan Abshir Cumar
Hadalka guddoomiyaha maxkamada Racfaanka ayaa
imanaya xili maalmihii ugu danbeeyayba baraha bulshada ay ku soo bannayeen
cabashada muwaadiniin Soomaaliyeed oo ku dooddaya in waxba laga qaban waayay
kiisas dacwado ah oo ay u gudbiyeen laamaha garsoorka dalka, qaarkood-na
waxaaba ay ku eedeeyeen qaar ka mid ah guddoomiyayaasha maxkamada in ay kala
kulmaan hanjabaado, marka la ogaado in dacwaddoodu tahay mid sax ah.
Dhawaan ayeey aheyd markii baraha bulshada uu ku
soo muuqday muwaadin Soomaaliyeed oo ku eedeeyay afhayeenkii hore ee gobolka
Banaadir Cabdifitaax Cumar Xalane in uu xoog uga heysto guri uu leeyahay oo
markii hore uu ka kireeyay, islamarkaana
waxba dacwadiisa ka qaban waayeen laamaha garsoorka.
Hasse ahaatee markii uu muuqaalkaa la wadaagay
baraha bulshada ayaa waxaa si deg deg ah arintiisa u soo fara-galiyay maamulka
gobolka Banaadir oo muwaadinkaa Soomaaliyeed ku wareejiyay gurigiisa.
Sidoo kale waxaa iyana jiray muwaadiniin
Soomaaliyeed oo si joogta ah maalmihii ugu danbeeyay-ba uga soo muuqanayay
baraha bulshada kuwaa oo ka dalbanaya madaxda ugu sareysa dalka in ay wax ka
qabtaan cabashadooda, madaama ay wax garsoor ka waayeen sida ay hadalka u
dhigeen hay’addaha cadaallada dalka.
Lama oga waxa ay ka badalli karto digniintan ka
soo baxday maxkamada Racfaanka cabashada ay dadka ku soo gudbiyaan baraha ay
bulshadu ku wada xiriirto.
C/raxmaan Diini, Hiiraan Online
[email protected]