Wasiirka warfaafinta Somaliland oo ka jawaabay hadal ka soo baxay wasiirka waxbarashada Soomaaliya
Sabti, Feberaayo, 16, 2019 (HOL)-
Wasiirka
warfaafinta Somaliland C/raxmaan C/laahi Guri- barwaaqo ayaa ka hadlay hadal ka
soo baxay wasiirka waxbarashada Soomaaliya Cabdilaahi Goodax bare oo
sheegay inay ka shaqaynayso guddi uu madax ka yahay inay dib usoo celiyaan
hantidii shacabka ee dawladda gacanteeda ka baxday.
Wasiir Goodax ayaa sheegay in hantidda shacabka
ee dib loogu soo celinayo gacanta dawlada ee ay diwaangalinayso ay ku jiraan
Somaliland hantidii dawladdu bixisay dib uga soo celinayaan dadkii la siiyey.
Haseyeeshee hadalkaasi wasiirka waxa ka jawaabay
wasiirka warfaafinta Somaliland Guri barwaaqo, waxaanu yidhi “Xukuumadda
Somaliland wax qiime ah agteeda kama laha, hadallada afka baarkiisa ah ee
Dawladda Magac u yaalka ah ee Soomaaliya ku marin habaabinayso Ummaddeeda
tabaaleysan, waxana dhaqan ka noqotay inay sheegato Somaliland oo ah
dal madaxbannaan oo ay kala baxeen rubuc qarni ka hor.Dawladda Muqdisho
ee ka dul talisa Tiknikada AMISOM, waxa la yaab noqotay inay shalay ku
dhawaaqday inay diiwaan-gelinayso hantida Ma Guurtada ah ee dalkeeda oo
ay sheegtay inay ku jirto Somaliland. Taasi oo ay uga dan leedahay inay
iskaga dejiso culaysyada iyo cadhada shacbiga Soomaaliya kaga soo horjeesteen
xaraashkii Toddobaadkii hore ay ku faasaxday Xukuumaddaasi Qaybo ka mid ah
shiidaalka ku jira dalkaas qalalaasuhu hadheeyey. Iyadoo horena ay u jirtay
inay hadyad u bixisay soohdin biyoodka dalkooda iyo khayraadkii ku
jiray.”
Waxanu intaas ku daray “Sidaas darteed, waxaan
ugu baaqaynaa Xukuumadda Soomaaliya inay u soo noqoto runta ka jirta
Gobolka Geeska Afrika oo ay ka waantowdo lab-la-kaca ay ku hawaysanayso inay
farogeliso dalka Somaliland oo ay shan madaxweyne si dimuqraadi ah oo nabdoon
xilka iskugu wareejiyeen.”
Barkhad-ladiif
M. Cumar, Hiiraan Online
[email protected]
Hargeysa,
Somaliland.