Agaasimayaasha Wasaaradaha Dastuurka Heer Federaal iyo Dowlad Goboleed oo shir uga furmay Baydhabo
Talaado, December, 10, 2019 (HOL)-Magaalada Baydhabo ee xarunta KMG u ah maamulka Koonfur Galbeed waxaa maanta ka furmay kulan farsamo oo ay leeyihiin Agaasimayaasha guud ee Wasaaradaha Dastuurka heer Federaal iyo Dowladaha xubnaha ka ah federaaka.
Kulanka waxaa ka Soo qayb galay agaasimayaasha guud ee Wasaaradaha
Dastuurka heer federal iyo heer Dowlad goboleed ee kala ah Agaasimaha
guud ee Wasaaradda Dastuurka Xukuumadda Federaalka ah ee Soomaaliya,
agaasimayaasha guud ee Jubbaland, Koonfur Galbeed, Galmudug iyo Hir
shabelle.
Kulanka ayaa u jeedadiisu tahay in la iska xog waraysto sida ugu haboon ee la iskaga kaashan karo arrimaha farsamo ee ku aadan howlaha dib-u-eegista dastuurka iyo doorka ay agaasimayaasha guud ka qaadan karaan xoojinta xiriirka iyo wada shaqaynta wasaaradaha dastuurka heer federal iyo heer dowladdaha xubnaha ka ah Federaalka.
Kulanka oo ah mid farsamo iyo is-xogwaraysi waxa uu socon doonaa
muddo saddex maalin ah iyadoo lagu lafa guri doono arrimaha farsamo iyo
in lagu soo bandhigo heerka uu marayo dib-u-eegista dastuurka iyo
qiimaynta horumarada laga garay iyo caqabadaha lala kulmay intii lagu
guda jiray dib-u-eegista Dastuurka.
Agaasimayaasha Guud ee wasaaradaha Dastuurka heer Federal ayaa soo dhoweeyay kulanka waxa ayna xuseen in lagama maarmaan ay tahay in la xoojiyo xiriirka wasaraadaha dastuurka ee heer federal iyo Heer Dowladaha Xubnaha ka ah federaalka islamarkaana ay ballan qaadeen in ay doorkooda ka qaadan doonaan sidii loo dhamaytiri lahaa dib-u-eegista dastuurka. Sidoo kale waxa ay xuseen in ay wasiirada dastuurka ee wasaaradahooda ay kala shaqayn doonaan sidii heshiis farsamo looga gaari
lahaa arrimaha u baahan wada xaajiiodyada siyaasadeed.
Dhanka kale, Agaasimaha Guud ee wasaaradda arrimaha Dastuurka XFS Maxamed Abukar Zubeyr ayaa sheegay in ay muhiim tahay wada shaqynta agaasimayaasha guud ee wasaraadaha dastuurka ee heer federal iyo heer dowla goboleed, si loo kala sooco arrimaha farsamo iyo arrimaha
siyaasadda.
“Natiijada laga filayo kulankaan ayaa ah in sare loo qaado wacyiga,
fahanka iyo macluumaadka heerarka uumarayo dib-u-eegista dastuurka si la
iskula jaanqaado” ayuu yuri Agaasimaha Guud ee Wasarradda Dastuurka XFS
Mohamed Abukar Zubeyr.
Ugu dambayn wasiir ku xigeenka Wasaaradda Arrimaha Dastuurka Koonfur
Galbeed Cabdullaahi Warsame oo kulanka furay ayaa uga mahadceliyay
agaasimayaasha guud sida ay u aqbaleen marti galinta shirka, waxa uuna
sheegay in ay muhiim tahay wada shaqaynta agaasimayaasha guud ee
wasaaradaha Dastuurka heer federal iyo heer dowlad goboleed si loo
dhammaystiro Dastuurka ku meelaarka ah.
C/raxmaan Diini, Hiiraan Online
[email protected]
