Xukuumadda Somaliland ka hadashay arrimihii ay ka wada hadleen madaxweyne Biixi iyo madaxda Imaaraadku
Axad, April, 21, 2019 (HOL) – Weftigii madaxweyne
Biixi oo maanta dalka dib ugu soo laabta ayaa sheegay inay arrimaha ay
Imaaraadka ka wada hadleen ay ka mid yihiin sidii Baanka dhexe ee Somaliland
loo xoojin lahaa, sidii Hay’ad xoolaha nool u dhoofisa caalamka u wada yeelan
lahaayeen Somaliland iyo Imaaraadku iyo sidii argagixisada looga wada
dagaalami lahaa.
Sidoo kale, waxa madaarkii Berbera ee saldhiga ka
dhisanayeen Imaaraadku ay hadda ku heshiiyeen in diyaaradaha ganacsiga ee
shacabkuna ku soo degi karaan oo diyaaradaha militeriga iyo kuwo shacabkuba ay
wadaagaan.
Wasiirka wasaaradda arrimaha dibadda iyo
Is-kaashiga caalamiga ah, Prof. Yaasiin Xaaji Maxamuud Xiir (Faratoon), oo ka
warbixinaya kulamaddii uu madaxweynuhu la yeeshay madaxda Imaaraadka waxa uu
yidhi “Waxa aad looga wada-hadlay is-kaashiga xagga nabadgelyada, sida aad og
tihiinna mandaqadda waxa aad ugu soo xoogaysanaya Argagixisada oo meelo badan
ku sugan, sidii arrintaas looga hor tagi lahaa, la isagana kaashan lahaa ayaa
kamid ahaa qodobbada ugu waaweyn ee uu wada-hadalkaasi ku saabsanaa.”
Sidoo kale, waxa uu tilmaamay in dhinaca
horumarka ka wada hadleen, waxaanu yidhi “waxyaalaha kale ee aanu ka wada
hadalnay waxa ka mid ahaa in Somaliland iyo dalka Imaaraadka carabtu ay si
wada-jir ah u sameeyaan hay’ad dhoofisa xoolaha Somaliland, taas oo iyadu
qaadda oo usii gudbisa caalamka intiisa kale, ama dalalka carabta ha noqoto,
ama dalal kale oo kasoo fog ha noqoto’e, arrintaasina waa arrin weyn oo lasoo
galay oo la filayo inay dhaqaalaha dalkan wax badan ka qaban doonto. Qodobbada
kale ee laga wada hadlay waxa kamid ahaa sidii Somaliland baankeeda dhexe loo
xoojin lahaa, dalkastana dhaqaalihiisa qayb weyn buu ka yahay baanku, Baanka,
ayaana dalka maaliyaddiisa haya oo xukuma oo qorsheeya, haddii uu dhaqaale
haystana wax badan kuu tari karaa,”
“madaarkii Berbera ee aad maqlayseen inuu
markii hore kamid ahaa saldhigga ay halkaas Imaaraadku ka samaysanayaan, waxa la
isla gartay inuu madaarkaasi noqdo mid diyaaradaha rayidka ah iyo kuwa
ganacsiguba ku degi karaan oo ka shaqaysan karaan oo aan ku koobnaan doonin
madaar militeri”ayuu yidhi farotoon.
Barkhad-ladiif M. Cumar, Hiiraan
Online
[email protected]
Hargeysa, Somaliland