Wararka Maanta: Sabti, Apr 20, 2019-Lacag Malaayiin dollar ah oo laga helay guriga madaxweynihii hore ee dalka Sudan

Lacag Malaayiin dollar ah oo laga helay guriga madaxweynihii hore ee dalka Sudan

Sabti, April, 20, 2019 (HOL)– Guddiga la-dagaallama musuqmaasuqa ee uu sameeyay golaha milateriga Suudaan ayaa sheegay in ciidammada ammaanku ay soo heleen lacago Euros, doollar iyo pound-ka Suudaan isugu jira oo wadartoodu ay gaareyso $104,837 milyan oo doollar.

Arrinta ayaa ka dambeysay, kaddib markii dacwad oogaha dalka Suudaan uu billaabay baaritaan uu ku sameynayo madaxweynaha xilka laga tuuray ee Cumar Xasan al-Bashiir, kaas oo loo haysto eedo ah inuu si sharci-darra ah lacago isugu kala gudbiyay iyo weliba inuu haysto lacago badan oo qalaad.

Lacagta hadda laga helay guriga Al Bashiir ayaa lagu shubay bangiga dhexe ee dalkaasi Suudaan.

Cumar Al Bashiir oo soddan sanno maamullayay dalka Suudaan ayaa xabsi la dhigay ,kaddib dibadbaxyo bilooyin socday oo isaga looga soo horjeeday oo xilka looga tuuray.

Iman Mohamed Jama, Hiiraan Online
[email protected]