Sabti, April, 20,
2019 (HOL) –Wasiirka Amniga xukuumadda Soomaaliya Maxamed Abuukar Isloow
Ducaale ayaa sheegay in dowladda Soomaaliya marnaba aqbali doonin in dadka lagu
marin habaabiyo sida uu hadalka u dhigay dibadbaxyo Facebook laga abuulo.
Labadii cisho ee la
soo dhaafay magaalada Muqdisho waxaa ka jirtay cabsi xoogan oo laga qabay in
qarxaan dibadbaxyo waaweyn oo looga soo horjeedo dowladda Soomaaliya, taa oo
sababatay in dowladdu ciidamo ku hubeysan gaadiidka dagaalka dhigtay dhamaanba
isgoysyada muhiimka ah si looga hortago dibadbaxyada.
Wasiiro Isloow ayaa
sheegay in fariimaha leysku daray ee ku saabsanaa dibadbaxyada ahaayeen kuwo
aan wax ba ka jirin oo la doonayay oo kaliya lagu marin habaabiyo sida uu
hadalka u dhigay Shacabka ku dhaqan magaalada Muqdisho.
‘’Bulshada waxaan
ugu baaqeynaa in ay la shaqeeyaan laamaha Amniga, islamarkaana aysan u
dhagtaagin wararka been abuurka ah ee la doonayo in lagu marin habaabiyo’’ ayuu
yiri Wasiirka Isloow.
Siyaasiyiin
taageersan dowladda ayaa sheegay in xubnaha mucaaradka ku ah dowladda iyo
xisbiyada siyaasada qaarkood gadaal ka riixayaan wararka lagu kicinayo
bulshada, gaar ahaan dibadbaxyada looga soo horjeedo dowladda inkastoo Khamiistii
aynu soo dhaafnay wax dibadbax ah uusan ka dhicin magaalada.
C/raxmaan Diini,
Hiiraan Online
[email protected]