Jimco, April, 19, 2019 (HOL)- Maanta oo Jimco
ah 19ka bisha April waxaa mar kale dib u dhac uu ku yimid shir ay isugu iman
lahaayeen madaxda dowlad gobolleedyada, kaa oo horay uu ugu baaqay madaxweynaha
dowladda Soomaaliya Maxamed Cabdullaahi Farmaajo
Shirkan oo ka furmi lahaa magaalada Muqdisho ayaa
lagu wada in looga arinsado arrimaha Amniga, waxaana ka soo qeybgalka shirkan
ka soo horjeestay qaar ka mid ah madaxda dowlad gobolleedyada.
Qaar ka mid ah madaxda dowlad gobolleedyada ayaa
hadda ku sugan magaalada Nairobi ee dalka Kenya waxaana ka mid ah
madaxweynayaasha Jubbaland iyo Galmudug, iyadoo maalmaha soo socdana la filayo
in ay ku biiraan qaar kale oo ka mid ah madaxda maamulada dalka ka jira sida
madaxweynaha Puntland Saciid Cabdullaahi Deni.
Waa markii labaad oo madaxda dowlad gobolleedyada
dalka ka baaqdaan shir uu ugu yeeray madaxweynaha dowladda Soomaaliya Maxamed
Cabdullaahi Farmaajo.
Galmudug ayaa horey u sheegtay in marnaba aysan
ka qeybgali doonin shirka Amniga ee Muqdisho ka furmaya iyadoo ku eedeysay
dowladda federaalka in ay fara-galin ba’an iyo kala qeybin ku heyso maamul
gobolleedka Galmudug.
Dhinaca kale waxaa hadda jira mugdi siyaasadeed
oo sop kala dhaxgalay maamulka Hirshabeelle iyo dowladda dhexe ee federaalka kaddib
shirkii gargaarka ee lagu soo gabagabeeyay Muqdisho oo madaxda Hirshabeelle
sheegeen in lagu duudisay xuquuqdii ay lahaayeen.
Wali wax war ah kama soo bixin madaxtooyada Soomaaliya, kaasi oo ku aaddan
shirkan lagu sheegay in maanta uu baaqday maadaama aysan imaan magaalada
muqdisho madaxda maamul gobaleedyada.
C/raxmaan Diini,
Hiiraan Online
[email protected]
