Guddoomiyaha gobolka Mudug ee Puntland "Waxaan filaynaa gobolka Mudug in uu hal maamul yeesho"
Axad, June, 17, 2018 (HOL) – Guddoomiyaha gobolka Mudug
ee Puntland,Xasan Maxamed Khaliif ayaa markii ugu horreysay sheegay inuu
rajo ka qabo gobolka Mudug inuu hal noqdo oo hal maamul uu yeesho, wuxuu
caddeeyay muddooyinkii u dambeeyay si wadajir ah inay u shaqeynayeen labada
maamul.
Khaliif, ma sheegin halka maamul ee u filayo gobolka inuu
yeesho, balse wuxuu xaqiijiyay wada shaqeynta ciidamada isku-dhafka ah ee ka
howlgalla magaalada Gaalkacyo inay wax badan ka badaleen amniga magaalada iyo
guud ahaan gobolka.
"Gobolka Mudug oo dhan ayaa wada shaqeynaya,
ciidamada hadda amniga ilaalinaya qabiil makala laha oo koonfur iyo waqooyi buu
jira maleh...Waxaana filaynaa inan u gudubno gobolka Mudug siddii uu ahaan
jirey inuu noqdo oo hal maamul yeesho oo bulshadu isku mid noqoto." ayuu
yiri, Xasan Maxamed Khaliif.
Magaalada Gaalkacyo ee xarunta gobolka Mudug ayaa si
wadajir ah waxaa uga taliya Puntland iyo Galmudug, waxaana bulshada ay u kala
qeybsanyihiin koonfurta iyo waqooyiga,khilaaf soo kala dhexgalay labada maamul
iyo bulshada kala qeybsan ayaana dhowr mar dhaliyay dagaal ay dad badan ku
dhinteen.
Iman Jama
