Talaado, October, 23, 2018
(HOL) – Ganacsatada gobolka Banaadir ayaa ka soo
horjeestay qoraal kasoo baxay Gudoomiyaha gobolka Banaadir ahna Duqa Muqdisho
Eng Cabdiraxmaan Cumar Cismaan Yariisow oo ganacsatada looga dalbanayay in ay
bixiyaan lacago loogu tala galay dhismaha Wadooyinka oo dhawaan la joojiyay.
Ganacsatada gobolka Banaadir ayaa dhawaan shaacisay in ay joojiyeen
lacagihii ay ku bixin jireen dhismaha Wadooyinka Muqdisho, kadib markii
ganacsatada ka hor yimaadeen in dad kale la wareegaan maamulka
lacagaha ay ganacsatada bixiso akoono gaar ahna loo sameysto.
Kulan maanta Dekadda Muqdisho ku yeesheen Ganacsatada gobolka Banaadir
ayey uga soo horjeesteen qoraalka Gudoomiyaha gobolka Banaadir iyo sidoo kale
in lacagihii ay bixin jireen ku shubaan akoono dad gaar ah sameesteen .
Gudoomiyaha Ganacsatada Suuqa Bakaaraha Xassan Mirre Dhiif ayaa sheegay
in ganacsatada gobolka Banaadir aysan raali ka aheyn in lacagtooda ku bixiyaan
sifo sharci daro ah sidoo kale maamulka gobolka Banaadirna ganacsatada u qasbo
dad gaar ah.
Waxa uu sheegay Xasan Mire sababaha ay u joojiyeen lacagihii ay bixin
jireen in ay tahay kadib markii la bedelay akoonadii lacagaha lagu shubi jiray
sidoo kale howsha gacanta loo galiyay dad aan aamin aheyn waxna aan ku darsan
lacagaha ay ganacsatada ku bixin jirtay dhismaha Wadooyinka.
Xasan Mirre ayaa sheegay in nasiib daro tahay in Ganacsatadii gobolka
Banaadir ee canshuurta bixiya loo qasbo dad gaar ah oo dano gaar ah leh sidoo
kale wax canshuur ah aan siin dowlada.
”Ganacsatada gobolka Banaadir waa kuwa kaliya ee canshuurta siiya
dowlada Dhaxe iyo Dowlada Hoose ee Xamar, Gudoomiyaha gobolka waxaan leeyahay
ha u qasbina ganacsatada aad canshuurta ka qaadaan dad dano gaar ah leh kuna
kalsooneyn ganacsatada , kooxda noola qasbayo waxa ay bil kasta Dekadda
Muqdisho ka qaataan 67-kun oo Dollar mana naqaan meel ay ku bixiyaan lacagtaasi
sharci darada lagu qaato ” ayuu yiri Xasan Mirre Dhiif.
Sidoo kale Abuubakar Xaaji Maxamuud oo kamid ah Ganacsatada gobolka
Banaadir ayaa ugu baaqay dowlada iyo maamulka gobolka Banaadir in aysan
cadaalada katigin ganacsatada aysan u qasbin koox gaar ah.
Ganacsatada
ayaa si weyn uga soo horjeestay Qoraalka kasoo baxay Duqa Muqdisho iyo in koox
gara ah la wareegto maamulka lacagihii ay Ganacsatada ku bixin jireen dhismaha
Wdaooyinka magaalada Muqdisho .
C/raxmaan Diini, Hiiraan
Online
[email protected]
