Wasiirka Amniga : Talaabo ayaan ka qaadeynaa dadkii ka danbeeyay weerarkii ka dhacay degmada Wadajir
Axad, October, 21, 2018 (HOL)- Wasiirka
Wasaarradda Amniga xukuumadda Soomaaliya Maxamed Abuukar Isloow Ducaale oo
booqday xaafadda Nasteexo ee degmada Wadajir ayaa uga tacsiyeeyay waxgaradka
deegaanka weerarkii ay dadka ku dhinteen oo ay ku qaadaan xaafadda ciidamo ka
tirsan dowladda Soomaaliya.
Wasiirka oo la kulmay odayaasha
iyo wax-garadka deegaanka ayaa u balanqaaday in dowladda Soomaaliya talaabo deg
deg ah ka qaadi doonto dadkii ka danbeeyay weerarka, isaga oo intaa ku daray in
dowladdu damaanad-qaadeyso in mar aysan dib u soo noqon arrintan oo kale.
‘’Waxaan rabaan in aan ka
tacsiyeeyo dadkii ku dhintay weerarka, waxaan idin leeyahay meydadka hala aaso,
dadka dhaawaca- ahna waa la daweynayaa, waxaan idinka codsaneynaa in
leys-dajiyo, dadkii arintan ka danbeeyay magacyo ayaan heynaa, waa lagu raad
joogaa tallaaba-na waa laga qaadayaa’’ ayuu yiri Wasiirka oo sidoo kale booqday
dadkii ay dhaawacyadu soo gaareen, ,kuwaa oo qaarkood ku dulkatii-nadeysnaa sariirihii ay ku jiifeen.
Inkastoo Wasiirku uusan ka hadal
in weerarkan ku lug lahaayeen saraakiil ka tirsan ciidamada Booliiska
Soomaaliyeed, haddana xildhibaanno ka tirsan Baarlamaanka ayaa ku eedeeyay saraakiisha ciidamada Booliiska in
ay ka danbeeyeen weerarkan, kuwaa oo qaarkood magac-yadooda la soo hadal
qaaday.
Xildhibaan Cabdirisaaq Cumar
Maxamed iyo Xildhibaan Maxamed Xassan Ibraahim Qoono ayaa warbaahinta u sheegay in weerarkaa dadka rayidka ah lagu dilay ka
danbeeyeen taliyaha ciidamada Booliiska gobolka Banaadir iyo taliyaha qeybta
Galbeed ee ciidamada Booliiska, waxaana uu ugu baaqay madaxda ugu sareysa dalka
in ay soo fara-galiyaan arintan.
C/raxmaan Diini, Hiiraan
Online
[email protected]
