Dowladda dhexe oo lagu eedeynayo in ay ka caga- jiideyso wada hadal lala galo maamul gobolleedyada
Axad, October, 21, 2018 (HOL) – Guddoonka
Aqalka sare ayaa sheegay in dowladda dhexe u muuqato in ay caga jiideyso
wada hadal lagu dhameeyo khilaafka kala dhaxeeya madaxda dowlad gobolleedyada
oo horay ugu dhawaaqay in ay xiriirka u jareen dowladda dhexe.
Guddoomiyaha Aqalka sare Cabdi
Xaanshi Cabdullaahi ayaa sheegay in ergo ka tirsan Aqalka sare oo loo kala
diray dowlad gobolleedyada dib warbixin ugu soo celiyeen golaha, laakiin
jawaabtii ay goor hore ka filayeen dhinaca xukuumada aan wali la helin.
Wuxuu ugu baaqay madaxweynaha iyo
ra’iisal wasaaraha in ay aqbalaan in arinka lagu dhameeyo miiska wada hadalka,
isaga oo intaa ku daray in madaxda dowlad gobolleedyada diyaar u yihiin wada
xaajood lala galo dowladda dhexe.
Cabdi Xaanshi ayaa sheegay in
dhinaca dowladda ay caga-jiideyso wada hadal lala galo maamul gobolleedyada,
waxaana uu muddo saddex cisho ah u qabtay madaxweynaha in uu jawaab uga bixiyo
baaqa golaha Aqalka sare ee Soomaaliya.
Maanta ayaa lagu wadaa in uu
magaalada Garoowe ka furmo shir ay halkaa ku leeyihiin ilaa saddex madaxweyne
gobolleed, waxaana shirka ka maqan madaxweynaha maamulka Hirshabeelle oo bishii
September ee ina dhaaftay ku dhawaaqay in uu heshiis la galay dowladda dhexe.
C/raxmaan Diini, Hiiraan
Online
[email protected]
