Khamiis, June, 21, 2018 (HOL) - Madaxweynaha
Mareykanka Donald Trump ayaa sheegay in uu si deg deg ah u saxiixi doono
dikreeta Madaxweyne taas oo ku saabsan in qoysaska qaxootiga ah iyo carruurtooda
aanan la kala geyn oo ay isla joogaan goobaha xudduuda Mexico.
Kal hore xiisad ayaa ka dhalatay markii kumanaan
carruur ah laga qaaday waalidiintooda isla markaana la geeyay xarumo gooni ah.
Caalamka ayaa si weyn uga carrooday siyaasada
qaxootiga ee dul qaad la’aanata ahi ee madaxweyen Trump, taasi oo ku saabsan in
xubanaha qoyska ee wada socda la kala qaybiyo inta dacwaddooda la dhagaysanayo.
Maanta oo khamiis ah ayaa Congress-ka Mareykanka
wuxuu u codeynaya xeer socdaalka iyo muhaajiriinta loo dejinayo oo lagu
joojinayo in carruurta la gala haro waalidiintooda sida sharcidarrada ahi ku
galay gudaha Mareykanka.
Arrintan ayaa ka dambeysay kaddib markii dalka
gudihiisa iyo dibadduba aad looga carooday sawiradii iyo oohintii ilma yar yar
oo meelo ku xiran oo u ooyaya waalidkood oo iyaguna meelo kale lagu hayo iyo
Madaxweyne Trump oo diiday in dhaqankaa la joojiyo.
Afhayeenka aqalka Paul Ryan ayaa sheegay in
xeerkani cusub uu xal u noqonayo mushkiladan iyo dadka faraha badan ee ku
qulqulaya gudaha Mareykanka ee magangelyo doonka iyo tahriibka isugu jira,
kuwaa oo keentay in 2,300 carruur ah la gala haro waalidiintooda tan iyo shanti
bishii May ee aynu soo dhaafnay.
Waxaa walaac ballaaran laga muujiyay waalidiinta
dalka laga dhoofiyo iyagoo aanay la socon carruurtii ay wateen oo laga reebay.
Garyaqaannada arrimaha socdaalka ayaa waxay sheegayaan in ay jiraan waalidiin
badan oo dalka laga dhoofiyay iyagoo aan ciyaalkoodii la socon, waxaana xitaa
jira waalidiin dalka laga dhoofiyay intii aanay helin carruurtoodii.
Xildhibaan John Lewis oo u ololeeya xuquuqda
dadka oo ka hadlay shir jaraaid oo ka dhacay washington wuxuu yiri waa in la
joojiyaa siyaasadda noocan ah ee lagu kala reebayo carruurta iyo
waalidiintooda.
Madaxweyne Trump oo aan wax caddeyn ah iyo daliil
u cuskan ayaa sheegay in kumanaan qof aysan ahayn ee malaayiin ay soo gali
doonaaan gudaha Mareykanka, waa haddii buu yiri aan tallaabo adag la qaadin.
BBC
