Mareykanka oo sheegay in uu isaga baxay xubinimada Golaha Xuquuqul Insaanka Qaramada Midoobey
Arbaco, June,20, 2018 (HOL)- Mareykanka ayaa ku dhawaaqay
inuu isaga baxay Xubinimada Golaha Xuquuqul Insaanka, iyagoo ka carrooday
tallaabooyinka Goluhu qaaday ee ka dhanka ah Israa’iil.
Safiirka Mareykanka u fadhida Qaramada Midoobey Nikki
Haley ayaa sheegtay in Golaha Xuquuqda Aadanaha uu yahay mid aan dhex dhexaad
aheyn.
Waxaa ay sheegtay in mar walba Goluhu ka dhigtay inuu
Israa’iil ka eexdo, iyadoo dhowaan Golaha Xuquuqul Insaanka cambaareeyay
xadgudubyada ka dhanka ah Bani’aadanimada ee Israa’iil u geysato dadka
Falastiiniyiinta.
Mareykanka ayaa dhowr jeer oo hore codka qayaxan kaga soo
horjeestay qaraaro ka dhan ah Israa’iil oo la horgeeyay Golaha Ammaanka ee
Qaramada Midoobey.
Maamulka Trump ayaa dhowaan u aqoonsaday in magaalada
Qudus tahay Caasimadda Israa’iil, isla markaana Safaaradda Mareykanka loo soo
raray, waxaana tallaabadaas ka dhashay cambaareyn iyo iyo kacdoono dadka reer
Falastiin ay sameeyeen.
C/raxmaan Diini, Hiiraan Online
[email protected]
